"Босимни унутинг, завқ олинг!" — Чилилик эксперт мундиалда Ўзбекистондан нима кутмоқда?

Узоқ йиллик орзу ва миллионлаб мухлисларнинг интизорлик билан кутган дамлари ниҳоят ҳақиқатга айланди. Эндиликда нафақат ўзбек футболи ишқибозлари, балки бутун жаҳон Океан ортига етиб келган дебютант — "оқ бўрилар" нинг ҳар бир қадамини диққат билан кузатиши табиий.

Мазкур тарихий воқеликка чилилик футбол эксперти, "Бунёдкор" собиқ легионери Хосе Луис Вильянуэва ҳам ўз муносабатини билдирди.

— Хосе, аввало бугунги кундаги фаолиятингиз ҳақида гапириб берсангиз. Эшитишимизча, океан ортида янги лойиҳа устида ишлаяпсиз?

— Салом! Ҳозирда мен Флоридада яшаяпман ва бор эътиборимни ўзимнинг асосий лойиҳам — "Golazo Training"га қаратганман. Менинг бош мақсадим — у худди "Uber" тизими каби ўйинчилар ва мураббийларни ўзаро боғлайдиган платформадир. Ушбу платформа мураббийлар учун бевосита майдонда ўтказиладиган тайёр машғулот дастурларини тақдим этади. Футболчилик фаолиятимни якунлаганимдан сўнг, ўз тажрибам билан ўртоқлашиш ва "Golazo Training" орқали янги авлоднинг футболдан завқ олишига кўмаклашиш менга жуда катта завқ бағишламоқда.

Айтганча, менда махсус таклиф бор! 17 июнь куни Мексикада, Ўзбекистон — Колумбия учрашувидан бироз олдин, ўзбекистонлик мухлислар билан ўртоқлик учрашуви ўтказмоқчиман. Бу жуда қизиқарли футбол тажрибаси бўлади. Агар ўша вақтда Мексикада бўлсангиз ва бизга қўшилишни ёки ўйнашни истасангиз, илтимос, мен билан “Instagram” да @joselovillanueva профили орқали боғланинг. У ерда кўплаб ўзбекистонлик мухлисларни кўришдан мамнун бўлардим!

— Ўзбекистон миллий терма жамоаси ўз тарихида илк бор Жаҳон чемпионатига йўлланма олди ва айни дамда мусобақага жиддий ҳозирлик кўрмоқда. Ушбу тарихий воқеликни қандай кутиб олдингиз?

— Мен Ўзбекистон учун жуда хурсандман! Мен у ерда "Бунёдкор" сафида ўйнаганман, шунинг учун футбол одамлар учун қанчалик катта аҳамиятга эга эканлигини биламан. Тарихда илк бор Жаҳон чемпионатига йўлланма олиш — бу улкан воқеа. Жамоани, уларни олиб чиққан Тимур Кападзени ва барча мухлисларни табриклайман!

— Бугунги Ўзбекистон терма жамоаси таркибидан қайси футболчиларни алоҳида ажратиб кўрсатган бўлардингиз? Кимлар Жаҳон чемпионатида жамоа етакчиси бўла олади?

— Менимча, Элдор Шомуродов жуда муҳим роль ўйнайди — у тажрибали ва голлар уради. Шунингдек, "Манчестер Сити"дан Абдуқодир Ҳусанов — у ёш, кучли ва юқори даражада тўп тепмоқда. "Бунёдкор" даги вақтимдан кўплаб футболчиларни танийман. Ўзбекистонда маҳоратли, техникаси кучли ўйинчилар бор.

— "Оқ бўрилар" жой олган гуруҳ (Португалия, Колумбия, Конго) анча мураккаб кўринмоқда. Жамоамизнинг имкониятларини қандай баҳолайсиз?

— Бу жуда қийин гуруҳ. Португалияда Роналду бор, Колумбия ҳар доим кучли, Конго эса жисмонан бақувват. Осон бўлмайди, лекин футболда ҳар нарса бўлиши мумкин. Ўзбекистон бор кучини кўрсатишга, очколар ишлашга ва бу тажрибадан завқланишга ҳаракат қилиши керак. Энг муҳими — ўрганиш ва келажак учун ўсишга эришиш.

— Ўзбекистонда ўтказган йилларингизни тез-тез эслаб турасизми? Хотирангизда энг ёрқин муҳрланиб қолган воқеа қайси?

— Ҳа, мен бу ҳақда тез-тез ўйлаб тураман. "Бунёдкор" да ўтказган вақтим жуда ўзгача эди. Дебют ўйинимда, ашаддий мухлислар қаршисида "Пахтакор"га гол урганим — ҳеч қачон унутмайдиган хотирамдир. Мен ҳамон "Бунёдкор"ни ва ўзбек футболини меҳр билан кузатиб бораман.

— Бу Жаҳон чемпионатида Ўзбекистондан ташқари яна қайси терма жамоаларни томоша қиласиз? Сизнинг севимли учлигингиз кимлар?

— Менинг энг севимли 3 та терма жамоам:

Бразилия — билмадим, Ривалдо билан муносабатим туфайли Бразилияни яхши кўраман.

Испания — улар чиройли футбол ўйнашади ва кўплаб иқтидорли футболчиларга эга.

Аргентина — улар кучли ва тажрибали. Месси тарих яратишда давом этиши мумкин.