БЎСМ директори ўзи ўқиган мактабга китоб совға қилди

Давлатимиз раҳбарининг ташаббуси ва таклифи  билан юртимизда китобхонликка бўлган қизиқиш янада ошаётгани ўғил-қизларимизнинг одоб-ахлоқига, тарбиясига сезиларли ижобий таъсир кўрсатиши бор гап, албатта. Мамлакатимиз бўйлаб барча даражадаги раҳбарлар, зиёлилар, ишчи-ходимлар томонидан ўзлари таҳсил олган умумий ўрта таълим мактабларига китобларни байрамона тарзда   совға қилиш жараёни ўзига хос анъанага айлангани қувонарли. Бундай эзгу ва хайрли ташаббуслар Қашқадарё вилоятида ҳам бошлаб юборилган. 

Хусусан, Қашқадарё вилояти Чироқчи туманидаги 1-сонли болалар ва ўсмирлар спорт мактаби директори Фарҳод Жуманов ҳам тумандаги ўзи тахсил олган 31-умумий ўрта таълим мактабига ўзбек миллий ҳамда жаҳон адабиёти намояндаларининг сара асарларидан иборат китоблар жамланмасини  совға қилди. 

Ўқувчилар дунё қарашини ривожлантирувчи асарлар сирасига шеър, ҳикоя ва қисса, шунингдек, қизиқарли эртаклар ҳам ўрин олган. Ушбу бадиий адабиётлар ўғил-қизларнинг ёшига мос тарзда танланган. Шунингдек, мазкур спорт мактабида режага мувофиқ эндиликда таниқли ёзувчи ва шоирларларнинг БЎСМ тарбияланувчилари билан ижодий учрашувлари, китобхонлик кечаларини ташкил этилиши ҳам  ёш спортчиларнинг нафақат жисмоний балки маънан тафаккури бойишига хизмат қилиши нақадар яхши.

Яна бир гап. Спорт мактабида ташқи футбол, волейбол майдонлари, енгил атлетика учун югуруш йўлакчалари мавжуд бўлиб, ҳар тонг ушбу спорт майдонларида турли ёшдаги одамларнинг эрталабки бадантарбия машғулотларида БЎСМ мураббийлари ва ишчи-ходимлари сафига қўшилаётганини ва гимнастика машғулотларини хушчақчақлик билан   кўтаринки кайфиятда бажарётганини таъкидлаб ўтмаса бўлмас.

Шундай экан, биз ҳам китобларни кўпроқ ўқийлик - дунёни теранроқ англаймиз, тафаккур оламимиз кенгроқ бўлади, жисмоний тарбия ва спортга ошно бўлиб, эрта тонг бир муддат бадантарбия қилайлик - жисмонан соғлом бўламиз, кун давомида ташлаган қадамларимиз шахдам бўлади.

Илҳом РАҲМОНОВ тайёрлади