БЎСМлар иш фаолияти самарадорлиги доимий назорат қилинади

Мамлакатимизда жисмоний тарбия ва спортни оммалаштириш, ёшлар орасида соғлом турмуш тарзини тарғиб қилишда Жисмоний тарбия ва спорт вазирлиги тизимидаги болалар-ўсмирлар спорт мактаблари муҳим ўрин тутади. Шу сабабли вазирлик томонидан миллий терма жамоаларимизга иқтидорли ёшларни тарбиялаб берувчи таянч масканлар саналадиган БЎСМлар фаолиятида иш самарадорлигини ошириш, тренерларнинг масъулият ҳиссини кучайтиришга алоҳида эътибор қаратилмоқда.

Таъкидлаш жоиз, сўнгги вақтларда мамлакатимизда тренерлар меҳнатини муносиб рағбатлантиришга алоҳида аҳамият берилмоқда. Шу мақсадда уларнинг маоши оширилди ҳамда қўшимча рағбатлантириш тизими йўлга қўйилди. Ўз навбатида тренерлар умумтаълим мактаблари ҳамда маҳаллама маҳалла юриб, иқтидорли ёшларни излаб топиши ва уларни катта спортга йўналтириши лозим.

Шунга қарамай соҳада айрим муаммо ва камчиликлар ҳам кўзга ташланмоқда. Кеча Жисмоний тарбия ва спорт вазирлиги раҳбарияти мавжуд вазиятни ўрганиш ва таҳлил қилиш, спортчи ёшлар билан учрашиш мақсадида Тошкент шаҳридаги бир қатор БЎСМлар фаолияти билан яқиндан танишди.

Шунингдек, Учтепа туман 1-сонли БЎСМда вазирлик мутасаддилари билан спорт таълим муассасаларининг тренерлари, услубчилари ва мутахассислар иштирокида самимий мулоқот ташкил этилди. Унда БЎСМлар фаолиятининг самарадорлигини янада ошириш, истеъдодли ёшларни излаб топиш ҳамда уларни катта спортга йўналтиришдаги ишларни кучайтириш, ёш авлод орасида жисмоний тарбия ва спортни оммалаштириш каби масалалар юзасидан ўзаро фикр алмашилиб, чора-тадбирлар белгиланди.