Бўстонлиқда спортчилар учун замонавий сиҳатгоҳ қад ростлайди

Юртимизнинг кўзга кўринган таэквондо ва боксчилари ушбу масканда бўлиб, бу ердаги шароитлар билан яқиндан танишишди. 

Албатта, бугунги кунда мамлакатимизда иқтисодий, ижтимоий, сиёсий ва маънавий жиҳатдан асосланган ўзига хос, соғлом турмуш тарзи маданияти таркиб топмоқда. Бу маданиятнинг таркибий қисми турли хилдаги машғулотлар билан боғлиқ. Бундай тараққиётни белгиловчи муҳим омил соғлом маданий ҳаёт, унинг таркибидаги миллат саломатлигидир. 

Бойлик саналган саломатликни сақлашда соғломлаштириш машғулотларининг аҳамияти беқиёс. Турли нуфуздаги чемпионатларда, халкаро турнирларда муваффақиятли иштирок этиб, юрт шарафини муносиб ҳимоя қилиб келаётган атлетларимиз мусобақалардан сўнг руҳий толиқиш, жисмоний зўриқишдан ўзларини тиклаб олишлари учун эндиликда янги лойиҳа ишлаб чиқилмоқда. 

Унга кўра, спортчилар экологик тоза ва ўзгача табиат гўзаллигига эга бўлган, ўзига мафтун этувчи ажойиб манзараларга эга дам олиш масканларида соғликларини тиклаш учун жалб этилиши кутилмоқда. Лойиҳалар кенгайтирилиб, бу ерда соғломлаштириш ва нафас олиш машқлари, умумжисмоний ҳолатни тиклаш учун шуғулланиш заллари, дам олиш маскани қурилиши режалаштирилмокда.

Тез орада етакчи спортчиларимиз чет элларда эмас, ўз уйимизда ва барча қулайликларга эга бўлган масканларда бўлажак мусобақаларга тайёргарлик кўришади.