Боёвутда Ўзбекистон кубоги старт олди

Ўзбекистон Республикаси Жисмоний тарбия ва спорт вазирлиги ҳамда Ўзбекистон миллий белбоғли кураш федерациясининг йиллик тақвим-режасидаги мазкур кубок беллашувларида Қорақалпоғистон Республикаси, Тошкент шаҳри ва вилоятлардан 250 нафардан ортиқ ёш полвонлар иштирок этишмоқда. 

Мазкур кубок баҳсларида ўғил болалар эркин ва классик йўналишларда ўн бир вазн тоифасида беллашишаётган бўлишса, қизлар эркин йўналишда еттита вазн тоифасида ўзаро куч синашишмоқда. Мусобақа доирасида шунингдек, тантанали очилиш маросими ҳам ташкил этилди. 

Маросимда сўз олган Боёвут тумани ҳокими ўринбосари Рустам Дўстмуродов, Ўзбекистон  миллий белбоғли кураш федерацияси раиси Равшан Дастиров, Сирдарё вилоят белбоғли кураш бош мураббийи Ҳусниддин Бердибековлар бугун мамлакатимизда жисмоний тарбия ва спортга, хусусан, болалар спортига қаратилаётган юксак эътибор туфайли оммавийлик ошаётгани, соғлом турмуш тарзи кенг тарғиб қилинаётгани хусусида таъкидлаб, спортчиларга омад тилашди. 

Бадиий ва спорт жамоаларининг кўргазмали чиқишлари маросимга янаям ўзгача завқ бағишлади. Шундан сўнг мусобоқага старт берилди. Беллашувулар 1 июлга қадар давом этади.

Тошкентбой ЯХШИБОЕВ, Ўзбекистон миллий белбоғли кураш федерацияси ҳакамлар ҳайъати раиси: 

- Мусобақа кўтарингки руҳда, муросасиз ва қизиқарли тусда ўтмоқда. Иштирокчи болаларнинг шиддат билан кураш тушиши ғолибликка иштиёқи юқори эканлигадан дарак бериб турибди.  Мусобақани тажрибали ҳакамларимиз томонидан бошқарилаётгани эса, беллашув эътирозларсиз ва муросасиз ўтишини таъминламоқда. Мазкур мусобақада истеъодли ўғил-қизлар кўпчиликни ташкил этаётгани ҳам терма жамоаларимизга муносиб издошлар етишиб чиқаётганидан, миллий белбоғли кураш янаям ривожланаётганидан далолат.

Илҳом РАҲМОНОВ Боёвут туманидан тайёрлади