"Бразилияда кутяпмиз". Оливейра жамоаси Махачевга мурожаат қилди

Бу ҳақда Оливейранинг мураббийи Диего Лима фикр билдириб, эҳтимолий рақиб сифатида россиялик Ислам Махачевни айтган. 

"Ўйлашимча, бу жангни ташкил қилишнинг имкони бор. Биз UFC`га ишлаймиз. Оливейранинг мураббийи сифатида эса кўпроқ унинг саломатлиги, фаолияти ҳақида қайғуришим керак. Кейин мени бир савол қийнайди – нима учун Бразилияда эмас?

Чарльз – чемпион. У тарихни янгилашда давом этмоқда. Хабиб нимага Махачев билан жангни Абу-Дабида ўтказмоқчи? Йўқ, биз Чарльзнинг Бразилияда жанг ўтказишини истаймиз. Биз билан жанг қилиш учун Бразилияга учиб келинглар", — дея Лиманинг сўзларини келтирмоқда Sportskeeda.

Эслатиб ўтамиз, Оливейра ўтган ҳафта Жастин Гэтжини биринчи раунднинг ўзида бўғиш усули билан мағлубиятга учратганди. Аммо, бу вазнда чемпионлик камари вакант бўлиб қолган эди. Бунга Чарльзнинг белгиланган вазнни қила олмагани сабаб бўлганди.