Бу оддий турнир эмас, бу Жаҳон чемпионати!

Ҳаётда ҳам, футболда ҳам ҳар бир мағлубият дарс бўлади. Ҳаётда қийналган кунингиз муаммоларни бартараф этишга ва янада кучли бўлишга ҳаракат қиласиз. Футболда ҳам мағлубият кейинги ўйин олдидан дарс беради. Янада кўпроқ ишлашга ва кучли бўлиб қайтишга ундайди. Бу ўринда энг муҳими чўкиб қолмаслик.

Кеча биз йирик мағлубиятни қабул қилиб олдик. Буни тўғри қабул қилиш керак. Кеча биз шунчаки оддий жамоага ютқазмадик, Жаҳон чемпионлиги учун даъвогар жамоага мағлуб бўлдик. Кеча биз 1000та гол уриб рекорд қўйишга ҳаракат қилаётган футболчи жамоасига енгиликдик. Маълум бўлишича, Криштиану Роналду кечаги иккита голдан кейин ўз голлари сонини 975тага етказибди.

Хурсанд қиладиган жиҳати, Жаҳон чемпионатига чиққанимиз, охирги бир ҳафта бутун Ўзбекистон футбол билан яшагани. Ҳаёт ташвишлари ҳам гўё унут бўлгандек, қаёққа қараманг, одамлар тилидан футбол тушмай қолди. Ишда футбол, уйда футбол, кўчада футбол, автобус, машина, метрода футбол - футбол кун мавзуси бўлиб қолди. Олдинлари ҳеч шундай бўлганмиди? Йўқ. Бунининг асосий сабаби Жаҳон чемпионатига чиққанимиз.

Айнан футбол сабаб кўплаб юртдошларимиз АҚШга йўл олишди. Шаҳарларда Ўзбекистон маданиятини кўрсатиб берувчи чиқишлар қилинди. Ижтимоий тармоқлар ҳам футбол мавзуси билан тўлиб кетди. Шу пайтгача қизиққан қизиқмаган, тушунган тушунмаган борки футбол ҳақида гапиряпти. Натижаларга қарамай, футбол атрофида шундай муҳит юзага келиши ва Ўзбекистон терма жамоаси ҳақида сўз бораётганининг ўзи катта гап.

Ўзбекистон - Португалия баҳси 2026 йилги Жаҳон чемпионати тақвимида расмий мақом билан №47-учрашув сифатида муҳрланди. Агар саралашни яхши ўтказмаганимизда 47-ўйинда биз эмас, умуман бошқа жамоа иштирок этган бўларди. Жаҳон чемпионатига илк бор чиққан терма жамоа учун бундан фахрлансак арзийди.

1998 йилдан бери Жаҳон чемпионатини кузатиб келаётган бўлсам, ниҳоят 8-мундиалга келиб Ўзбекистон иштирокини кўрдик. Бу жуда катта гап. Аввалги ЖЧларда бошқа жамоаларга мухлислик қилиб ёки шунчаки ўйинларни кўриб вақт ўтказганмиз, мана энди ўзимиз Жаҳон чемпионатини нималигини ичдан ҳис қилдик. Ҳозир АҚШда бўлиб турган юртдошларимиз умуман ўзгача ҳолатда эканини жуда яхши тушуниб турибмиз.

Ушбу Жаҳон чемпионати терма жамоамизнинг Колумбия ва Португалияга мағлуб бўлгани билан эмас, балки ўзбек футболи ривожига катта туртки бергани билан ёдда қолишини хоҳлаймиз. Айтиб ўтганимиздек, бундай катта мусобақадаги ҳар бир ўйиндан дарс олиш лозим. Мутахассислар, мураббийлар бунинг устида ишлаши керак.

Бу ўйинлар келажакда бизга қандай ёрдам бериши мумкинлиги устида бош қотириш зарур. Ҳозир биринчи йил имтиҳон топшириб, имтиҳондан йиқилган абитуриент ҳолатидамиз, кайфиятимиз тушиб кетган, лекин синиб қолмаслигимиз шарт. Синсак бошқалар ўзиб кетади. Янада кучли бўлиб бор эътиборни кейинги мақсадга қаратишимизга тўғри келади.

Хайрулла Холиқов.