13 фев 14:27
Янгиликлар

Қишки спорт турлари, Харбин-2025

Бу қизиқ! Чигирев ва Гейниш 26 йиллик танаффусдан кейин Ўзбекистонга яна олтин медални тақдим этди. Сўнгги олтин кимга тегишли эди?

Кеча Хитойнинг Харбин шаҳрида ўтказилаётган IX қишки Осиё ўйинларида Ўзбекистон мусобақадаги илк медалини қўлга киритди.

Фигурали учишнинг жуфтлик йўналишидаги спортчиларимиз Дмитрий Чигирев ва Екатерина Гейниш қисқа ва эркин дастурлар якунига кўра 176.43 балл жамғариб, энг яхши натижани қайд этди.

Бу Ўзбекистон делегациясининг қишки Осиё ўйинларида 26 йилдан кейин қўлга киритган илк олтин медалига айланди.

Сўнгги бор 1999 йилда Корея Республикасининг Кангвон шаҳрида ташкил этилган қишки Осиё ўйинларида фигурали учувчи Татьяна Малинина биринчи бўлганди. У ҳозирда фигурали учиш оламининг энг машҳур шахсларидан бири — Илья Малининнинг онаси ҳисобланади.