Бу қизиқ! Камерунда қабр қазиган "рус Нганну"си бирин-кетин рақибларини нокаутга учратиб, UFC сари интилмоқда. "Қора икра" Богдан Гусковнинг дўсти ва жамоадоши!

UFC’да фаолият олиб бораётган бразилиялик Уолтер Уокер ўзини "рус мужиги" деб атайди, асли нигериялик Давид Самуэль эса март ойида PFL’даги дебют жангини ғалаба билан бошлади.

Янги қаҳрамон — мағлубият нималигини билмайдиган камерунлик ўрта вазн жангчиси Эмиль Кузьмич (3-0). У жангларидан кейин Россия байроғини кўтариб чиқади. Кузьмич Москвадаги Gor MMA клуби шарафини ҳимоя қилади, UFC жангчилари, ўзбекистонлик Богдан Гусков ва Сергей Павлович билан бирга машғулот ўтказади. Қизиғи, у барча рақибларини биринчи раунднинг ўзидаёқ нокаут қиляпти ва шу билан таниляпти.

Кузьмич Камерунда қабр қазиган, Россияда эса қурилишда ишлаган. Энди у ММАда "Қора икра" лақаби остида юлдузга айланмоқда

Кузьмични "рус Нганну"деб аташ мумкин. Чунки у ҳам камерунлик UFC собиқ чемпиони Фрэнсис Нганну каби Африкадаги қашшоқликдан чиқиб келган ва ҳозир ММАда самарали фаолият олиб боряпти. Камерунда Кузьмич қабр қазиган бўлса, Нганну қум карьерларида меҳнат қилган. Россияга кўчиб келгач эса Кузьмич қурилишда ишлаган.

Қоматдор африкалик жангчини мураббий Гор Азизьян пайқаб қолган ва уни ўз залига таклиф қилган. Шунингдек, қурилишда ортиқча куч сарфламаслиги учун маъмур ёрдамчиси сифатида ишга жойлаштирган. Қабр қазувчи образи Кузьмичнинг ММАдаги ўзига хос жиҳатига айланган, гарчи у "Қора икра" лақаби билан жанг қилса ҳам.

2025 йилда Кузьмич Россиянинг MMA Series лигасида аралаш якка курашлардаги дебют жангини ўтказди. Октябрь ойида у қўл жанги бўйича спорт устаси номзоди Шамиль Багавдиновни 27 сония ичида нокаут қилди. Декабрда эса Top Dog Prospect турнирида унчалик ҳам таниқли бўлмаган боксчи Тулпар Дакаевни 36 сонияда таслим этди. Дакаевни Кузьмич партерда мағлуб этди ва тейкдаун қилишга уринган рақибини жазолади. Багавдинов эса янада ёрқин тарзда нокаут қилинди — рақиби зарбадан кейин мувозанатни йўқотган пайтда Кузьмич уни оёқ зарбаси билан қулаб тушириб, бурнини синдирди.

Бироқ бу ғалабани ортиқча бўрттирмаслик керак. Багавдинов ММАда 35 ёшида дебют қилган ва жангда Кузьмичдан деярли икки баробар кичик кўринган. Қолаверса, Кузьмич вазн ўлчаш маросимидан ҳам ўта олмаган. У ўрта вазн учун жуда катта жангчи ҳисобланади — бўйи 182 сантиметр бўлиб, вазн лимитига тушиши қийин кечади.

Кузьмич UFC юлдузлари билан машғулот ўтказмоқда — уни юқори босқичга тайёрлашяпти. Эмиль учинчи жангида ҳам рақибини биринчи раундда нокаутга учратди

Ижтимоий тармоқлардан кўриниб турибдики, Gor MMA клубида Кузьмичга катта умид боғлашмоқда ва уни UFC’га тайёрлашмоқда. Залда UFC жангчилари — Богдан Гусков, Сергей Павлович, Шара Буллет ва Уолтер Уокер машғулот ўтказади. Айниқса, ярим оғир вазн тоифасида UFC’да фаолият олиб бораётган ўзбекистонлик Гусков билан Кузьмичнинг муносабати яқин. Улар биргаликда машқ қилади, ижтимоий тармоқлар учун видеолар суратга олади, Пасха байрамида эса черковдаги маросимда ҳам қатнашган.

Кузьмич умуман олганда, рус маданиятини яхши кўради: тил ўрганяпти, Россия байроғини олиб чиқяпти ва жангга "Матушка земля" қўшиғи остида чиқяпти. Камерунлик жангчининг самоварлар билан тушган сурати айниқса мухлислар эътиборини тортган.

15 май куни кечқурун Кузьмич ММАдаги учинчи жангини ўтказиб, Ural FC промоушенида дебют қилди. У панкратион бўйича Ўзбекистон чемпиони Оламназар Отажоновга қарши октагонга чиқди. Отажонов ҳам ММАда дебют қилаётган эди, аммо ҳамюртимиз стердаун вақтида Кузьмични қўрқитишга уринди.

Отажонов жангни фаол бошлади ва кескин зарбалар билан ташланди. Кузьмич очиқ "рубка"га киришмади, зарбалардан қочиб, қарши ҳужум қилишга уринди. Отажоновнинг босими узоқ давом этмади — у тез чарчади, Кузьмич эса аниқ зарбаларини ўтказа бошлади. Натижада жанг 2:45 дақиқада корпусга йўлланган тизза зарбасидан кейин нокаут билан якунланди.

Багавдиновга қарши дебют жангидек, Кузьмич бу сафар ҳам яхши реакцияси ва кучли оёқ зарбаларини намойиш этди. Аввалги жангда у рақибини юз қисмига болдир зарбасини йўналтириб, нокаут қилган бўлса, бу сафар у тизза зарбаси билан ғалаба қозонди. Бироқ қўл билан бўлган алмашинувларда рақиби чарчаб қолмагунича унда катта устунлик сезилмади.

Ҳозирча Кузьмичга қулай рақиблар танланмоқда — у биринчи раунддаги ғалабалар ҳисобини асосан дебютантлар эвазига тўлдирмоқда. Фақат Дакаевнинг битта мағлубиятли ММА жанги бор эди. Шу боис, 27 ёшли жангчининг Россиядан ташқаридаги келажагига ҳозирча ишониш қийин, чунки унинг техникаси ҳали хом.

Декабрь ойида у ҳатто фижитал жанг санъатлари турнирида мағлуб бўлганди. Ўшанда Кузьмич Тунис вакили, рекорди 1-2-1 бўлган, кам танилган Абдулла Рахман Дридига қарши жанг қилиб, учинчи раундда бўғиш усули билан ютқазганди.

Бироқ бу мағлубият расмий рекордга киритилмаган. Сабаби, мусобақа норасмий форматда ўтган: жангчилар аввал Mortal Kombat ўйинида беллашган, кейин эса ММА қоидалари асосида жанг қилган. Якуний натижа икки босқичнинг умумий ҳисоби орқали аниқланган.

Хорижий материаллар таржимаси асосида тайёрланди