Бу қизиқ: UFC рейтингида пайдо бўлган иккинчи ўзбек — Рамазон Темиров қанчалик тез чемпионлик жангига етиб бориши мумкин? У кейинги жангида ким билан тўқнаш келади? Эҳтимолий рақибларни кўриб чиқамиз

UFC'нинг қароргоҳи бўлмиш Лас-Вегасдаги "UFC Apex" мажмуасида бўлиб ўтган Fight Night туркумидаги турнирнинг прелим кардида октагонга кўтарилган 28 ёшли Рамазон мусобақани ўз жанги билан бошлаб берди.

У ўз дивизионининг рейтингида 12-ўринни эгаллаб турган америкалик Чарльз Жонсон билан тўқнаш келди. Жанг олдидан Жонсоннинг етарлича тажриба эканлиги ва жангда Темировга муносиб қаршилик кўрсатиши тахмин қилинганди. Бироқ Рамазон барча тахминларни йўққа чиқарган ҳолда рақибини ҳакамларнинг якдил қарори ила мағлубиятга учратди.

Бу ака-ука Темировларнинг каттаси учун UFC промоушенидаги иккинчи жанг эди. Рамазон ўз орзусидаги Лигадаги илк жангида бошқа бир америкалик — Си Жей Вергарани биринчи раунддаёқ нокаутга учратганди. Шундай қилиб, у дунёнинг энг яхши ММА Лигаси бўлиб турган UFC'да иккинчи жангидаёқ рейтингга кириб олишнинг уддасидан чиқди.

Ҳозир қашқадарёлик спортчи рейтингда 13-ўринни эгаллаб турибди. Унга мағлуб бўлган Чарльз Жонсон эса бугун янгиланган рейтингда бир поғона юқорилаб, 14-ўринга жойлашди. Мьянма вакили Жошуа Ван эса рейтингнинг сўнгги поғонасида пайдо бўлди.

Ғалабасидан кейинги матбуот анжуманида Рамазон энди ёзда навбатдаги жанги учун тўлиқ тайёр бўлишини айтганди. У ҳозир Ўзбекистонда, яна ҳам аниқроғи, туғилиб ўсган макони Қашқадарёда бўлиб турибди. Аммо спортчимизнинг ижтимоий тармоқлардаги саҳифаларига назар ташласак, ҳозирча машғулотларга қайтмагани ойдинлашади.

Юқорида айтиб ўтилган матбуот анжуманида Темиров дивизион чемпиони, бразилиялик Александр Пантожа, бундан ташқари, собиқ чемпион Брэндон Моренони жангга чорлаб, улар билан октагонни бўлишиш нияти борлигини маълум қилди. Бироқ UFC катта эҳтимол билан ҳамюртимизга бунчалик тез орада камар учун даъвогарларни рақиб сифатида бермаса керак. Умуман олганда, шахсий наздимга кўра, UFC бу вазнда чемпионлик ёки катта жангни ташкил қилишда 2 та факторга кўпроқ аҳамият берса керак:

Биринчиси: Собиқ чемпионлар — Брэндон Морено ва Кай Кара Франс иштирокида катта жанглар ташкил этиш;

Иккинчиси: биринчи фактор туфайли амалдаги чемпион Пантожага рейтингнинг қуйироғидаги жангчиларни бериш.

Аҳамият берган бўлсангиз, Александр 2023 йил ёзида мексикалик Моренони мағлуб этиб, камарни қўлга киритганидан кейин собиқ чемпионлар билан умуман тўқнаш келмади. У фаолияти давомида Кай Кара Франс билан 2016, Брэндон Морено билан эса 2016, 2018 ва 2023 йилларда тўқнаш келган. Чемпион бўлганидан кейин эса гарчи даъвогар бўлса-да, на Кара-Франс, ва на Морено унга рақиб сифатида берилди. Яъни, бунга шундай қараш мумкин: UFC Пантожанинг собиқ чемпионлар билан эҳтимолий беллашувлари мухлислар учун энди қизиқарли эмас, деб ҳисоблайди.

Пантожа чемпион бўлганидан кейин иккинчи ҳимоя жангида ўша пайтда рейтингнинг тўққизинчи поғонасидаги (!) австралиялик Стив Эрцег билан тўқнаш келди ва ғолиб бўлди. Учинчи ҳимоя уринишида эса бугун рейтингни тарк этган япониялик Кай Асакурага имкон берилди ва бу сафар Пантожа муддатидан олдин зафар қучди. Аммо муҳими бу эмас, муҳими UFC Пантожа чемпион бўлиб турган давр мобайнида камарна расмий даъвогарлардан кўра рейтингнинг иккинчи ярмидагиларга кўпроқ имконият бермоқда. Бу дегани, Рамазоннинг чемпионни жангга чорлагани оддий гап-сўзлар эмас, унинг қадри бундан анчайин баландроқ. Яъни, келгусида унга ҳам Эрцег ё Асакурага берилган сюрпризлар насиб этиши эҳтимоли мавжуд.

Аммо бундан олдин Темиров энг камида яна битта юқори савиядаги жангни ўтказиши талаб қилинади. Қуйида сизлар билан Рамазоннинг кейинги жанги учун эҳтимолий рақибларни кўриб чиқамиз.

1. Жошуа Ван. Ҳа, UFC рейтингдаги сўнгги ўринни эгаллаб турган спортчини айнан Темировга бериши мумкин. Боиси, UFC'да одатда дивизионларнинг 15-поғонасидаги жангчига 10-ўриндан кейин жойлашганлар рақиб сифатида тақдим этилади. Ван 23 ёшда. Мьянмалик спортчи фаолияти давомида 13 та ғалаба ва 2 та мағлубият қайд этиб улгурган. UFC'да эса 2023-2025 йиллар давомида 7 та жанг ўтказиб, 6 та ғалаба ва 1 та мағлубият қайд этган. Рамазон очколарга ютган Чарльз Жонсонни Жошуа Ван учични раундда нокаутга учратган. У сўнгги жангини 9 март куни UFC 313 доирасида япониялик Рей Цуруяга қарши ўтказиб, кунчиқар юрт вакилига фаолиятидаги илк мағлубиятини совға қилди. Ваннинг кўрсаткичларига қараб, Рамазон учун рақибликка жиддий номзодлардан эканини пайқаш мумкин.

2. Бруно Сильва. Бразилиялик 35 ёшли аралаш якка кураш устаси UFC'да 7 та жанг ўтказган ва 4 та ғалаба, 3 та мағлубиятни ўз ҳисобига ёздирган. У иштирокидаги битта беллашув эса ўтказилмаган деб топилган. Сильва дунёнинг энг кучли ММА Лигасида 2019 йил сентябрь ойидан буён фаолият юритади. У учта мағлубиятини чехиялик UFC собиқ жангчиси Давид Дворак, россиялик Тагир Уланбеков ҳамда чемпионлик даъвогар бўлиб турган португалиялик Манель Капедан қабул қилган. Сўнгги жанги ҳам ўтган йилнинг декабрь ойида айнан Капега қарши бўлган. Ўша жангда Бруно учинчи раундда нокаутга учраганди. Сильва ҳозирда UFC рейтингида 12-ўринда. Унга ҳозирча промоушен янги рақиб ва жанг санасини бермаган. Шундай экан, ўзбекистонлик ММА мухлислари Темировнинг кейинги жангида Бруно Силвани ҳам рақиб сифатида октагонда кўришлари эҳтимоли мавжуд.

3. Тагир Уланбеков. Активлиги анчайин тушиб кетган россиялик ММА жангчиси ҳозирда UFC рейтингида 11-ўринни банд этиб турибди. 33 ёшли Тагир беш йилдан буён бир йилда атиги бир мартадан жанг ўтказиб келмоқда. 2024 йил ҳаттоки умуман октагонга чиқмади. Шундай бўлса-да, у рейтингдаги ўрнини сақлаб турибди. Учта ғалабали серияда келаётган Уланбеков UFC'да 2020 йилдан буён 6 та жанг ўтказиб, 5 та ғалаба ва 1 та мағлубият қайд этган. Умумий ҳисобида 16 та ғалаба ва 2 та мағлубият бор. Ҳозирча катта рақиблар билан тўқнаш келмаган. Юқорида тилга олинган Бруно Сильвани Лигадаги дебют жангида ютган, энди ёзадиганимиз — Тим Эллиотдан эса ҳозирча ягона бўлиб турган (UFC'да) мағлубиятини қабул қилиб олган. У сўнгги жангини январь ойида Клэйтон Карпентерга қарши ўтказиб, зафар қучганди. Агар ўз анъанасига қарши чиқиб, бир йилда икки маротаба жанг ўтказишга рози бўлса, Тагир ёзда Рамазон Темиров билан баҳс олиб бориши мумкин бўлган номзодлардар бири.

4. Тим Эллиот. Америкалик спортчи. "Қария" десак ҳам, муболаға бўлмайди. Боиси, у ўзининг 38 баҳорини "уриб қўйган". Узоқ фаолияти давомида UFC'да 9 та ғалаба ва 11 та мағлубият (2012-2023), бутун фаолиятида 20 та ғалаба, 13 та мағлубият ва 1 та дуранг қайд этган. Орада бошқа Лигаларга ҳам бориб келган Эллиот сўнгги йилларда Тагир Уланбековни ютди, Брэндон Ройвал, Матеус Николау, Муҳаммад Мокаев каби таниқлиларга ютқазди. Охирги жангини 2023 йил декабрида хитойлик Сумудаержига қарши ўтказиб, муддатидан олдин ғалаба қозонган. Аммо қарийб бир ярим йилдан ошиқроқ вақт давомида октагонга чиқмади. Унинг қайтиши айнан Темировга қарши бўлиши мумкин. Чунки UFC Рамазонни яна бир бор синаб олиш учун тажрибали "қария"ни ўртага ташлаши мумкин. Биз бу ҳолатни бошқа дивизионларда кўриб келяпмиз.

5. UFC'га яқинда кириб келган, аммо рейтингдан ўрин олмаган, истиқбол сифатида қаралаётган спортчига қарши эҳтимолий жанг. Рамазоннинг Чарльз Жонсон билан жанги ҳам шу турдаги баҳс эди. Темиров ҳозирча рейтингнинг қуйи поғонасида бўлгани учун ҳам бундай жанглардан қоча олмайди. Ва ўзи айтганидек, рақиб ҳам танламайди. Аммо у шунингдек, иложи борича тезроқ камар учун жангга етиб бориш ниятида эканини таъкидлаганди. 

Хулоса ўрнида шуни айтиш мумкинки, UFC'нинг бу вазн тоифаси энг зерикарли ва лозим бўлса, "жар ёқасидаги" дивизион эканича қолмоқда. Юқорида санаб ўтган эҳтимолий рақибларимизнинг ҳолатидан ҳам буни билиб олиш мумкин. Бири 2 йилда бир маротаба жанг қилса, иккинчиси 2 йилдан буён умуман жанг қилмаган. Яна бир нафари эса ҳозирга қадар катта номлар билан жанг қилмасдан, рейтингда юрибди. Шундай экан, биз ўзимиз кўриб юрган Рамазон Темировнинг чемпионлик йўли анчайин осон кечадигандек туюлмоқда. Аммо бу UFC, бу ММА. Октагонда ҳамма нарса бўлиши мумкинлигини барчамиз яхши биламиз. Лекин ҳамюртимизга мухлислик қилишдан ва унга омад тилашдан тўхтамаймиз.

Муаллиф: Диёрбек Мавлонов/olamsport.com