"Бу қўрқинчли эди". Блахович уни қўрқитган жароҳат ҳақида гапирди

Спортчининг сўзларига қараганда, у соғлигидаги муаммо сабаб, октагонга қайтишга шошилишни истамаган.

"Кунлардан бирида уйғониб, бўйнимда оғриқ сездим. Аввалига, бу нотўғри ётганим туфайли бўлса керак деб ўйладим. Залда одатий машғулотларни ўтказдик, ҳимояда зарбалардан бирини ўтказиб юбордим ва бирдан бўйнимда оғриқ сездим. Чап қўлим ва танамнинг чап томонини сезмай қолдим.

Улар шунчаки ишламаётган эди. Фалаж бўлиб қолган эди. Бу нормал ҳолат эмаслигини тушундим. Ёмон бўлди.

Шифокор ҳузурига бордим, МРТ қилдирдик. Маълум бўлишича, бўйнимдаги диск билан боғлиқ муаммоларим бор экан. У нерв толаларига таъсир ўтказаркан. Шунинг учун мен қўрқаётгандим.

Бу қўрқинчли эди. Нима бўлаётганини тушунмасдим. Ғалати, янги, қўрқинчли туйғу эди. Шифокор уч ҳафта давомида даволанишимни, агар бу ёрдам бермаса, операция қилишларини айтди. Яхшиямки, операция бўлмади", - дея Блаховичнинг сўзларини келтиради MMA Fighting.