Бугун Муҳиддин Мадаминов "Ал-Беруний" халқаро турнири чемпиони бўлиши мумкин

Мусобақа уч гуруҳда ўтказилмоқда. "Мастерс" гуруҳида рейтинги 2600 ва ундан юқори бўлган 6 нафар хорижлик шахматчининг иштирок этаётгани мусобақа нуфузидан дарак бермоқда. Кеча ўтказилган 8-турда ёш гроссмейтеримиз Муҳиддин Мадаминов оқ доналарда яна бир иқтидорли шахматчимиз Ортиқ Ниғматовдан устидан муҳим ғалабага эришиб, очколарини 6 тага етказиб олди.  

Рапид бўйича амалдаги жаҳон чемпиони Володар Мурзин ҳам бу турда ғалаба қозонди. У оқ доналарда гроссмейстеримиз Абдумалик Абдусалимовни енгди. Арманистонлик Ҳайк Мартиросян хитойлик Ма Кюн билан дуранг ўйнади. Владислав Артамьев Санан Сюгировдан устун келди. Афруза Ҳамдамова арманистонлик гроссмейстер Шант Саргсян билан муросага келди. 

Саккизинчи турдан сўнг "Мастерс" гуруҳи турнир жадвалида Муҳиддин Мадаминов 6 очко билан якка пешқадам бўлиб олди. Шант Саргсян ва Ҳайк Мартиросян ҳисобида 5,5 тадан очко бор. Кучли бешликдан жой олган Володар Мурзин ва Владислав Артамьев ҳисобида 5 очкодан бор. Бугун 9-турда Мадаминов қора доналарда Санан Сюгиров билан ҳисоб-китоб қилади. Абдусалимов Мартиросян, Ниғматов эса Мурзинга қарши баҳс олиб боради.  

"Челленжер" гуруҳида 8-турдан кейин икки нафар иштирокчи - Давид Паравян ва (Россия) ва Данешвар Бардия (Эрон) 5,5 тадан очко жамғариб, қўшҳокимлик қиляпти. Россиялик яна бир гроссмейстер Арсений Нестеров 5 очко билан кучли учликка якун ясаган. Ёш шахматчимиз Ҳумоюн Бегмуратов кеча 8-турда Бардияга имкониятни бой берди. У 4 очко билан 4-ўриндан жой олган. 

"Фьючерс" гуруҳида туркманистонлик Сапармират Атабаев 8 имкониятдан 6 очко жамғариб, қўшимча кўрсаткичларга кўра карвонбошилик қилмоқда. Атабаев 8-турда оқ доналарда ўйнашига қарамай, истеъдодли шахматчимиз Гулдона Каримовани енга олмади. Ушбу партия дуранг билан якунланди. Очколарини 6 тага етказиб олган россиялик Клементи Сичёв ва ҳиндистонлик Па Иниян кучли учликка якун ясаган. Ҳамюртларимиз орасида энг яхши натижага Асроржон Омонов эришиб турибди. У 4 очко билан 6-поғонадан жой олган. Омонов 8-турда айнан Пага ютқазди. Умида Омонова ва Нилуфар Якуббоева ўртасидаги ўзбек дербисида дуранг қайд этилди.