Бугун Пхёнчханда Паралимпия ўйинлари старт олади

Ҳисоб бўйича XII Қишки Паралимпия ўйинлари бугун бошланади ва 18 мартга қадар давом этади.

Ушбу ўйинларда спортчилар олти ҳил йўналишда медаллар учун кураш олиб борадилар:

1. Биатлон

2. Кёрлинг

3. Тоғ чанғиси

4. Чанғи пойгалари

5. Пара-сноуборд

6. Следж-хоккей.

Баҳслар саккизта иншоотда ташкил қилинади:

Олимпия стадиони - очилиш ва ёпилиш маросимлари

"Альпензия" биатлон маркази - биатлон

"Альпензия" чанғи маркази - чанғи пойгалари

Ёнгпёнг тоғ чанғи базаси - тоғ чанғиси

Бугван Фёникс Парк - пара-сноуборд

Жубон тоғ чанғи стадиони - тоғ чанғиси

Квандон университетининг спорт аренаси - следж-хоккей

Каннин муз саройи - кёрлинг

Мусобақада 80 та медаллар жамланмаси ўйналади. Таъкидлаб ўтиш лозимки, бу Сочидаги баҳслардан саккизтага кўпдир. 2014 йилги Паралимпия ўйинларида 72 та медаллар жамланмаси ўз эгаларига топширилганди.

Паралимпия ўйинларининг тимсоли Осиё қора айиғи - Пандаби. У кучли ирода ва жасорат тимсоли ҳисобланади.

Ўйинларда умумий ҳисобда 48 мамлакат паралимпиячилари иштирок этади. Баҳсларда Грузия ва КХДРдан вакиллар илк маротаба қатнашмоқдалар.

Маълумот учун, Паралимпиадада ўзбекистонлик спортчи ҳам иштирок этади. Ҳамюртимиз Ёқутхон Холбекова чанғи пойгалари баҳсида юртимиз шарафини ҳимоя қилади.