Бухорода замонавий дзюдо спорт зали фойдаланишга топширилди ФОТОРЕПОРТАЖ

Тадбирда Халқ таълими вазири Бахтиёр Саидов, Бухоро вилояти ҳокими Ботир Зарипов, Ўзбекистон дзюдо федерацияси раиси ўринбосари Зафар Мамажонов, вилоят халқ таълими, спортни ривожлантириш бошқармалари, Бухоро шаҳридаги умумтаълим мактаблари раҳбарлари ҳамда ёшлар иштирок этди.

Қайд этилганидек, сўнгги йилларда мамлакатимизда Президентимиз раҳнамолигида спортни ривожлантириш, ёш иқтидорли спортчиларни кашф этиш, уларнинг муносиб машғулотлар ўташлари учун замонавий спорт иншоотлари барпо этишга алоҳида эътибор қаратилмоқда.

Бухоро шаҳридаги 10-умумтаълим мактаби ўқувчилари, қолаверса, маҳалла ёшларига спорт билан мунтазам шуғулланиш имкониятини тақдим этаётган янги марказ Ўзбекистон дзюдо федерацияси ҳамда қатор ҳамкор ташкилотларнинг 3 млрд. сўмдан ортиқ маблаги эвазига қуриб битказилди. Очилиш маросимида спортчи ёшларнинг кўргазмали чиқишлари ташкил қилинди. 

Ўйлаймизки, Бухоро заминидан Ришод Собиров, Рамзиддин Саидов, Камол Муродов, Шаҳрам Аҳадов сингари дунёга машҳур дзюдочилар етишиб чиқади.