Candidates Tournament 2024. 6-турдан кейин қўшҳокимлик давом этади + ФОТО

Эркаклар ва аёллар ўртасидаги ушбу мусобақада 8 нафардан шахмат юлдузлари жаҳон тожи учун даъвогар номини аниқлаб бериш учун ўзаро дона суришяпти.

Эркаклар ўртасидаги турнирда америкаликлар Ҳикару Накамура, Фабиано Каруана, ҳинд гроссмейстерлари Сантош Гужрати, Гукеш Доммараджу, Рамешбабу Праггнанадҳа, озарбайжонлик Нижат Абасов, франциялик Алиреза Фирузжа ҳамда FIDE байроғи остида қатнашаётган Ян Непомняший ўз маҳоратини намойиш этмоқда.

Худди 5-турда бўлгани сингари 6-турнинг икки партиясида томонлар муросага келишди. Қолган икки партияда шахматчиларнинг бири ғалабага эришди. Пешқадам Ян Непомняший бу турда оқ доналарда ҳаракат қилиб, америкалик Фабиано Каруана билан дурангга имзо чекди. 

Ҳиндистонлик Гукеш Доммараджу ҳам бу турда муроса кўчасини танлади. У америкалик Ҳикару Накамура билан дуранг қайд этди. Бугун ўтказиладиган 7-тур олдидан Гукеш ва Непомняший 4 тадан очко жамғариб, турнир жадвалида қўшҳокимлик қилишяпти. 

Эслатиб ўтамиз, 22 апрелга қадар давом этадиган ушбу турнир ғолиби амалдаги жаҳон чемпиони, хитойлик гроссмейстер Дин Лижэнга қарши жаҳон тожи учун дона суриш ҳуқуқини қўлга киритади. 

Candidates Tournament 2024. 6-тур натижалари

Гукеш Доммараджу (Ҳиндистон, 2743) — Хикару Накамура (АҚШ, 2789) — 1/2:1/2.

Видит Гуджрати (Ҳиндистон, 2727) — Алиреза Фируджа (Франция, 2760) — 1:0.

Рамешбабу Прагнанандха (Ҳиндистон, 2747) — Ниджат Абасов (Озарбайжон, 2632) — 1:0.

Ян Непомнящий (FIDE, 2758) — Фабиано Каруана (АҚШ, 2803) — 1/2:1/2.

Маълумот учун, ушбу даъвогарлар турнирида ҳамюртимиз Нодирбек Абдусатторов иштирок этмаяпти. Боиси, мусобақанинг барча саккиз иштирокчиси турли саралаш турнирлари орқали йўлланмани қўлга киритган.