Царукян UFC гонорарлари ҳақида: "Деярли ҳеч нарса қолмайди"

Асли келиб чиқиши арманистонлик бўлган аралаш яккакураш устаси ҳозирча олаётган гонорари жангларга тайёргарлик кўришда ўзини ва жамоасини таъминлашга зўрға етишини, вазиятни эса яхши даромад келтирадиган ҳомийлик шартномалари қутқариб қолаётганини тан олди.

"Уч юз минг доллардан ортиқ маош олмайман. Ва бу гонорар ғалаба учунгина берилади. Ютқазган жангларимда юз мингдан сал кўпроқ ишлаганман. Бу сумманинг 30% солиққа, беш минги зал, беш минги мураббийга, ўн беш минги менежерга кетади. Икки-уч ой тайёргарлик кўриб, нолга тушасан. Деярли ҳеч нарса қолмайди. Лекин ютган бўлсанг, албатта, бонус оласан. Бу мотивация. Ҳомийлик шартномалари ҳам бор - шундан пул топаман. Агар чемпионлик камарини қўлга киритсам, табиийки, гонорарим ҳам кўпроқ бўлади, бу ёзиб қўйилган, лекин барибир миллион эмас. Бир сўз билан айтганда кўнгилдагидек эмас", - деди Царукян YouTube’даги каналида эълон қилинган видеода.

Маълумот учун, у икки ҳафтадан сўнг Қатарда ўтказиладиган UFC Fight Night 265 турнирининг асосий жангида янги зеландиялик Ден Хукерга қарши октагонга чиқади.