Чарльз Оливейра даҳшатли нокаутидан кейин қайтишга тайёр, эҳтимолий рақиб ҳам маълум

Ўшанда Оливейра Испания ва Грузия байроқлари остида жанг қилиб келаётган Илия Топурияга биринчи раунднинг ўзида нокаут эвазига ютқазиб қўйган эди. Чарльз кейинги жангини қачон ўтказишини билишини айтди. У ноябрь ойида Нью-Йоркдаги "Мэдисон Сквер Гарден" аренасида ташкил этиладиган рақамли UFC турнирида октагонга чиқмоқчи.

"Макс Холлоуэй июль ойида жанг ўтказади, мен эса июнда октагонга чиқдим. Ўйлашимча, ноябрь – иккимизнинг жангимиз учун қулай вақт. Агар амалга ошса, мухлислар учун ажойиб жанг бўлар эди. Макснинг ўзи ҳам бу жангга рози эканини айтди. Нима учун йўқ?", – дея AG Fight нашрига интервью берган Оливейра.

Айнан Нью-Йоркда Чарльз Оливейра фаолиятидаги ҳозирча сўнгги ғалабасини нишонлаганди. Ўтган йилнинг ноябрь ойида у Майкл Чендлерни очколар ҳисобига кўра мағлубиятга учратган эди. Макс Холлоуэй эса 19 июль куни Янги Орлеанда ташкил этиладиган UFC 318 турнирида BMF камарини Дастин Порьедан ҳимоя қилади.