Чемпионат якунлари таҳлил қилиниб, режалар белгилаб олинди

Унда вилоятларда фаолият юритаётган мураббийлар, ёшлар ва катталар ўртасида ўтказилган Ўзбекистон чемпионатининг ғолиб ҳамда совриндорлари, ҳакамлар иштирок этди.

Йиғилишга бошчилик қилган Ўзбекистон Миллий олимпия қўмитаси раис ўринбосари, Ўзбекистон дзюдо федерацияси раиси Азизжон Камилов ёшлар ва катталар терма жамоамиз аъзолари билан мулоқотга киришди.

Федерация раҳбари сўзи аввалида пойтахтимизда икки ҳафта оралиғида ёшлар ва катталар ўртасидаги Ўзбекистон чемпионатининг муваффақиятли тарзда ўтказилгани билан табриклаб, барчага миннатдорчилик билдирди.

Шундан сўнг йиғлишнинг асосий масалалари юзасидан муҳокамага ўтилди.

 Федерация раиси дзюдочиларимизни остонада эшик қоқаётган 2021 йилда муросасиз мавсум кутаётгани, буни ҳар бир спортчи қалбидан ҳис қилиб, ҳар бир беллашувга финал баҳсига чиқаётгандек тайёргарлик кўриши кераклигини урғулади.  

Шунингдек, йиғилишда Париж-2024 Олимпиадасига ҳозирнинг ўзидан бошлаб тайёргарлик кўриш, селекция ишларини жадаллаштириш, вилоятлар кесимида ўсмирлар ва ёшлар ўртасидаги мусобақаларни кўпроқ ўтказиш, малакали мураббий ва ҳакамларни тайёрлашга урғу қаратиш масаласи энг устувор вазифалардан бўлиши айтилди.