Чемпионларни етиштирган мураббий билан маҳорат сабоқлари + ФОТО

Хусусан, кейинги йилларда оғир атлетика бўйича Ўзбекистон миллий терма жамоаси йирик халқаро спорт мусобақаларида муваффақиятли иштирок этиб келаётгани ҳам ҳеч кимга сир эмас.

Оғир атлетикачиларимизнинг халқаро мусобақалардаги муваффақиятли иштироки кўпгина омилларга, жумладан, уларнинг техник-тактик тайёргарлигига ҳам боғлиқ. Шу масалалар бугунги кунда соҳа мутахассисларининг диққат марказида, десак адашмаймиз.

Ўзбекистон давлат жисмоний тарбия ва спорт университетининг “Оғир атлетика назарияси ва услубияти” кафедраси ҳамда Ўзбекистон оғир атлетика федрацияси билан ҳамкорликда қўшма илмий-амалий семинар ташкил этилди.

Семинарда оғир атлетика бўйича миллий терма жамоамиз бош мураббийи, Лондон-2012 олимпия ўйинлари иштирокчиси, кўплаб жаҳон ва Осиё чемпионларини етиштирган мураббий Баҳром Мендибоев ўзининг “Юқори малакали оғир атлетикачилар машғулотларида махсус тайёргарлик воситаларининг самарадорлиги” мавзусидаги маърузаси билан иштирок этди ҳамда амалий машғулот ўтди.

Шунингдек семинарда университет талабалари билан бир қаторда Жиззах ва Нукус олимпия захиралари коллежларининг оғир атлетика бўлими спортчилари ҳам иштирок этишди.