Чимаев чемпионлик жанги учун Кисловодскда йиғин ўтказяпти, Хотамбек Бойназаров ҳам ўша ерда

У 17 август куни UFC 319 турнири марказий беллашуви доирасида ўрта вазн тоифасининг амалдаги чемпиони Дрикюс Дю Плессига қарши октагонга кўтарилади.

Хамзат мазкур жанг олдидан илк ўқув-машғулот йиғинини Россия Федерациясининг Кисловодск курорт-шаҳрида бошлади. Тармоқларда ММА жангчисининг эркин кураш бўйича икки карра Олимпия ўйинлари ғолиби Абдулрашид Садуллаев билан кураш тушаётгани акс этган видео тарқалди.

Бундан ташқари, биз учун аҳамиятлиси, ярим ўрта вазн тоифасида фаолият олиб борувчи ўзбекистонлик аралаш яккакураш устаси Хотамбек Бойназаров ҳам айнан Кисловодскда машғулот олиб боряпти. Қуйидаги суратда унинг таниқли россиялик ММА жангчиси Абубакар Вагаев билан бирга эканини кўриш мумкин.

Маълумот учун, Чимаев ва Бойназаров Дубайдаги TKMMA залида ҳам бирга машғулот ўтказишарди.