09 фев 13:47
Янгиликлар

Бошқалар

Чирчиқда Ўзбек жанг санъати бўйича Ўзбекистон чемпионати ўтазилди

5-8 февраль кунлари Ўзбекистон давлат жисмоний тарбия ва спорт университети манежида миллий спорт туримиз —Ўзбек жанг санъати бўйича ўсмирлар, ёшлар ва катталар ўртасида Ўзбекистон чемпионати бўлиб ўтди.

Ўзбекистон Республикаси спорт вазирлиги ҳамда Ўзбек жанг федерациясининг 2026 йил тақвим-режасидаги мамлакат чемпионатида Қорақалпоғистон Республикаси, Тошкент шаҳри ҳамда барча вилоятлардан келган 1000 нафардан зиёд спортчилар Ўзбек жанг санъатининг "Беллашув" йўналиши бўйича куч синашишди.

Юқори савияда, муросасиз ва шиддатли тусда ўтган мусобақанинг биринчи куни тантанали очилиш маросими ташкил этилди. Унда Ўзбек жанг санъати федерацияси раиси Пўлат Усмонов, Ўзбекистон давлат жисмоний тарбия ва спорт университетининг проректори Шерзод Мирзанов ва бошқалар иштирок этиб, спортчиларга омад тилашди.

Якуний натижаларига кўра, умумжамоа ҳисобида фахрли биринчи ўринни Тошкент вилояти жамоаси қўлга киритган бўлса, иккинчи ўринни Андижон ва Бухоро вилояти жамоалари эгаллади. Учинчи ўрин Сирдарё ҳамда Жиззах вилояти спортчиларига насиб этди.

Барча вазн тоифаларида кучли учликдан жой олган атлетлар медаль ва диплом билан тақдирланишди. Шунингдек, мусобақа олдидан федерация раҳбари Пўлат Усмонов бошчилигида 500 нафарга яқин Ўзбек жанг санъати мураббийлари учун ўқув-амалий семинар ҳам ташкил этилди.

Таъкидлаш жоиз, Ўзбек жанг санъати спорт тури бўйича жорий йил нуфузли халқаро мусобақалар ўтказилади ва мазкур чемпионат ёш тоифаларига кўра, терма жамоаларга саралаш вазифасини ўтаб бериши билан ҳам аҳамиятли бўлди.