Чирчиқда ўзбек жанг санъати бўйича Ўзбекистон кубоги ўтказилди + ФОТОГАЛЕРЕЯ

Ёшлар, ўсмирлар ва катталар ўртасида ўтказилган мазкур мусобақада барча ҳудудларидан келган 800 нафарга яқин спортчилар ўзбек жанг санъатининг "Беллашув" йўналиши бўйича ўзаро куч синашишди. 

Мусобақада спортчилар нафақат жисмоний тайёргарлиги, балки тезкор фикрлаши, жасорати ва миллий жанг усулларини пухта эгаллаганини ҳам намоён этишди. 

Зеро, ўзбек жанг санъати — шунчаки спорт эмас. Унда халқимизнинг бой тарихи, миллий қадриятлари, урф-одатлари ва аждодларимиздан мерос бўлиб келаётган жанг усуллари мужассам. Ота-боболаримиздан авлодларга ўтиб келган ушбу ноёб мерос бугун замонавий спорт талаблари асосида янада такомиллашиб, санъат даражасига кўтарилмоқда.

Чирчиқда ўтган беллашувлар эса ўзбек жанг санъати юртимизда тобора оммалашиб, янги иқтидорлар ва кучли спортчилар сафини кенгайтириб бораётганининг яна бир яққол далили бўлди, дейиш мумкин. 

Мусобақа доирасида шунингдек, тантанали очилиш маросими ҳам кўтаринки руҳда ўтказилди. Унда Ўзбек жанг санъати федерацияси раиси Пўлат Усмонов, ЎзДЖТСУ ректори Рашид Маткаримов ҳамда спорт соҳаси вакиллари иштирок этиб, мусобақа қатнашчиларига омад ва зафарлар тилашди. 

Икки кунлик баҳслар якунига кўра, умумжамоа ҳисобида қўйдаги жамоалар кучли учликдан жой олишди. Мусобақа якунида ҳар бир вазн тоифасида ғолиб ва совриндорлар диплом ва медаллар билан тақдирланишди. 

Ёшлар

1. Тошкент вилояти

2. Наманган вилояти

3. Самарқанд вилояти

Ўсмирлар

1. Бухоро вилояти

2. Фарғона вилояти 

3. Қорақалпоғистон Республикаси

Катталар

1. Андижон вилояти 

2. Тошкент шаҳри

3. Хоразм вилояти. 

Илҳом РАҲМОНОВ тайёрлади