Циципас Лос-Кабосда фаолиятидаги 10-совринга эга чиқди

Дунёнинг бешинчи ракеткаси Стефанос Циципас ушбу мусобақа бош совринини қўлга киритди. Грециялик теннис устаси ҳал қилувчи финал учрашувида рейтингнинг 19-поғонасидан жой олган австралиялик Алекс Де Минаурни 6/3, 6/4 ҳисобларида мағлубиятга учратди. 

Теннисчиларнинг ўзаро учрашувларидаги ҳисоб грек фойдасига янада йириклашди - 12:1. Бир соату 27 дақиқа давом этган баҳсда Циципас 2, Де Минаур 1 та эйс зарбасини амалга оширган. Брейклар Стефанос фойдасига 4 га 2 кўринишда бўлди. 

Циципас фаолиятидаги 10-совринга айнан Мексикадаги турнирда эга чиқди. Бу унинг жорий мавсумдаги биринчи титули ҳисобланади. Стефанос бир ҳафталик меҳнатидан 250 рейтинг очкоси ҳамда 129,660 доллар мукофот пули ишлаб олди. У эртага янгиланадиган рейтингда 4-ўринга кўтарилиб олади. Де Минаур 150 очко ва 75,630 долларга эга бўлди.