Coca-Cola Суперлигаси. Бугун 19-тур бошланади

Иккинчи даврани ажойиб тарзда бошлаган "Сўғдиёна" мусобақа жадвалининг сўнгги поғоналаридан бирини эгаллаб турган "Андижон" меҳмони бўлади.

Ўзаро ўйинлар тарихига мурожаат қилсак 39та учрашувнинг 16тасида "Сўғдиёна" 3 очкога эга чиққан. Худди шунча баҳсда "Андижон" ғолиб бўлган. Қолган етти учрашувда ғолиб аниқланмаган. Биринчи даврада Жиззахда ўтган учрашувда 2:1 ҳисобида "Сўғдиёна" ғалаба қозонган эди.

Улуғбек Бақоев бошчилигидаги "Сўғдиёна" иккинчи даврадаги бешта ўйинда умуман ютқазгани йўқ (4 ғалаба, 1 дуранг). "Андижон" эса охирги икки турда икки марта мағлуб бўлди.

“Андижон” – “Сўғдиёна”

13 сентябрь 2019 йил. Андижон, "Соғлом Авлод" стадиони. 18:00

Ҳакамлар: Зокир Қодиров, Руслан Самандаров, Расулжон Фозилов, Иброҳим Исмоилов

Чемпионат аутсайдери "Бухоро" ўз майдонида чемпионат дебютанти "Сурхон"ни қабул қилади. Бу клублар Ўзбекистон чемпионатида 25 марта тўқнаш келишган. Катта устунлик "Бухоро" томонида - 15 ғалаба. Олти бор "Сурхон" 3 очкога эга чиққан ва 4 марта дуранг кузатилган.

Биринчи даврада Термизда ўтган ўзаро ўйинда "Сурхон" 1:0 ҳисобида ғалаба қозонган эди. "Бухоро" Суперлигада ўз майдонидаги охирги 3та ўйинда ҳеч кимга ютқазгани йўқ (бир ғалаба ва икки дуранг). "Сурхон" эса аксинча сафардаги сўнгги 4та учрашувнинг барчасида мағлубият аламини тотиб кўрди.

Ўтган турда иккала жамоа ҳам гол ўтказмасдан ғалабага эришди. "Сурхон" ўз уйида "Қизилқум"ни 2:0 ҳисобида таслим қилган бўлса, "Бухоро" Самарқандда "Динамо"ни 3:0 ҳисобида мағлуб этди.

Маълумот учун, ортда қолган 18та турда Суперлигада энг кўп кам гол урган гол - "Бухоро" (12та).

“Бухоро” – “Сурхон”

13 сентябрь 2019 йил. Бухоро, "Бухоро" стадиони. 18:30

Ҳакамлар: Темур Тўхтасинов, Анвар Маражабов, Шохрух Аъзамов, Исхақ Ибрагимов