27 мар 11:11
Янгиликлар

Бокс/ММА

Дана Уайт Махачев жангини кечиктирди: ҳимоянинг янги муддати маълум

UFC раҳбари Дана Уайт 11 июль куни Лас-Вегасда бўлиб ўтадиган Халқаро жанглар ҳафталигида Ислам Махачев ярим ўрта вазн тоифасидаги чемпионлик камарини ҳимоя қилиши ҳақидаги хабарга изоҳ берди.

"Июль нотўғри маълумот, Исламнинг жанги август ойида бўлади", - деб ёзди ташкилот раҳбари ижтимоий тармоқдаги саҳифасида.

Бир кун аввал россиялик жангчининг июль ойида октагонга қайтишини унинг менежери Али Абдел-Азиз маълум қилганди. Айни пайтда август ойида ўтказилиши режалаштирилган UFC’нинг рақамли турнири расман эълон қилинмаган - санаси ҳам, локацияси ҳам йўқ.

Абдел-Азизнинг сўзларига кўра, Махачевнинг рақиби топ ярим ўрта вазн тоифасидаги жангчилардан бири бўлади. Чемпионлик жанги учун потенциал номзодлар орасида мос равишда дивизион рейтингида еттинчи, учинчи ва иккинчи ўринларни эгаллаб турган нигериялик Камару Усман, эквадорлик Майкл Морралес ҳамда ирландиялик Иан Мачадо Гарри бор.

Эслатиб ўтамиз, 34 ёшли Махачев ўтган йилнинг ноябрь ойида ярим ўрта вазн тоифасида австралиялик Жек Делла Маддаленани беш раунд якунига кўра ҳакамларнинг якдил қарори билан мағлубиятга учратиб, UFC чемпиони бўлганди.