Даниил Медведев French Open учинчи даврасига чиқди

Дунёнинг иккинчи ракеткаси Даниил Медведев Франция Очиқ чемпионатининг учинчи давра иштирокчисига айланди. Россиялик теннис устаси иккинчи босқич баҳсида ATP рейтингида 56-ўринни эгаллаб турган сербиялик Ласло Дьерени мағлуб этди - 6/3, 6/4, 6/3.

Икки соату 35 дақиқа давом этган 26 ёшлилар учрашувида Даниил 7 та эйс ва шунча брейк-пойнтни амалга оширди, 5 та қўшхатога йўл қўйди. Теннисчиларнинг ўзаро учрашувларида ҳисоб тенглашди - 1:1.

Энди Даниил Медведев учинчи даврада яна бир серб теннисчиси Миомир Кечмановичга қарши кортга чиқади. Миомир ўз ўрнида қозоғистонлик Александр Бубликдан устун келди - 4/6, 7/5, 6/2, 6/1.