Давлат Бобонов ва Музаффарбек Тўрабоевдан ёшлар учун унутилмас маҳорат сабоғи + ФОТОРЕПОРТАЖ

Токио-2020 ва Париж-2024 Олимпия ўйинларининг совриндорлари, жаҳон чемпионлари Давлат Бобонов ва Музаффарбек Тўрабоев жиззахлик ёш дзюдочилар учун айнан мамлакат чемпионатида ўтган муҳташам аренада мастер класс, яъни маҳорат сабоқларини ўтказиб беришди. 

Татамида спортимиз юлдузлари билан ўтказилган машғулот болаларнинг бир умр ёдида қоладиган бўлди. Албатта, улар ўзлари ҳавас қилган дзюдочилар билан елкама-елка туриб шуғулланишди. Катта йўл бошида турган ёш дзюдочиларимиз учун бу ҳақиқий байрам бўлди. 

Машғулот якунида дзюдо тўгараги тарбияланувчилари ўзларини қизиқтирган саволларга жавоб олишди. Бобонов ва Тўрабоев Олимпия шоҳсупасигача босиб ўтилган мураккаб йўл ҳақида сўзлаб беришди. 

Тадбир сўнггида икки авлод вакиллари эсдалик учун суратга тушишди. Фотосессия олдидан эса дзюдочиларга совғалар улашилди.