"Дэвис Кубоги". Ўзбекистон терма жамоасининг Босния ва Герцеговинага қарши ўйини саналари маълум

Ёдингизда бўлса, Ўзбекистон терма жамоаси сентябрь ойида II Жаҳон гуруҳи доирасида Эстонияни қабул қилиб, 3:1 ҳисобида ғалаба қозонган эди. Мазкур ғалаба орқали I Жаҳон гуруҳи учун плей-офф босқичига йўл олган терма жамоамизнинг кейинги рақиби Босния ва Герцеговина бўлади.

Ушбу баҳс 2025 йилнинг 31 январь — 1 февраль кунлари Ўзбекистонда ўтказилади. Ҳозирча мусобақага қайси шаҳар ёки мажмуа мезбон бўлиши, қандай кортда ўтказилиши аниқ эмас. Ўзбекистон терма жамоаси ушбу ўйинда ғалаба қозониш орқали яна I Жаҳон гуруҳига қайтиши мумкин.

Жамоалар шу кунгача ўзаро ўйин ўтказишмаган. Босния ва Герцеговина терма жамоаси сўнгги ўйинини сентябрь ойида I Жаҳон гуруҳи доирасида Хитой Тайпейига қарши ўтказиб, 2:3 ҳисобида имкониятни бой берган эди.

Маълумот учун, Ўзбекистон терма жамоаси "Дэвис Кубоги" рейтингида 287,5 очкога эга бўлган ҳолда 42-ўринни эгаллаб турибди. Босния ва Герцеговина эса рейтингда 30-ўринга жойлашган.