Дзюдо. Ўзбекистоннинг Япониядаги элчихонасида учрашув бўлиб ўтди

Маросимда элчихона расмий вакиллари, Ўзбекистон миллий олимпия қўмитаси ҳамда Япониядаги Ўзбекистон ёшлари ассоциацияси ходимлари ҳозир бўлишди. Ўзбекистон дзюдо федерацияси раиси Азизжон Камилов юртимизда олимпия оиласига мансуб дзюдо спорт турига қаратилаётган ҳукумат даражасидаги эътибор, бунинг натижасида дзюдо билан ошно тутинаётган ёшлар сонининг ортиб бораётгани, мамлакатимизда IJF (Халқаро дзюдо федерацияси) шафеълигида ўтказилаётган нуфузли мусобақалар ҳақида атрофлича маълумот берди. 

Тадбирда муҳокама қилинган энг асосий масала бу шубҳасиз, ўзбекистонлик спортчилар, хусусан дзюдо бўйича терма жамоамизнинг Токио-2020 Олимпиадаси йўлида олиб бораётган тайёргарлиги бўлди. Ўзбекистон миллий олимпия қўмитаси вице-президенти Азизжон Камилов бу ҳақда ҳам йиғилганларга сўзлаб берди. 

Шунингдек, маросимда Ўзбекистон терма жамоасининг Токио шаҳрида старт олиш арафасида турган жаҳон чемпионатига олиб борган ҳозирлиги бўйича ҳам сўз борди. Дўстона руҳда ўтган учрашув сўнггида Ўзбекистон дзюдо федерацияси ҳамда Япониядаги Ўзбекистон ёшлари ассоциацияси ўртасида ҳамкорлик Меморандуми имзоланди. Келишувга Азизжон Камилов ва ассоциация раиси Жўрабек Ҳасанов имзо чекишди. 

Ўзбекистон дзюдо федерацияси ушбу учрашувни ташкил этишда яқиндан ёрдам берган мамлакатимизнинг Япониядаги элчихонаси ходимлари, хусусан элчининг савдо-иқтисодий масалалар бўйича маслаҳатчиси Хуршид Ҳайдаров ҳамда Ўзбекистон миллий олимпия қўмитасига миннатдорчилик билдиради.