Дзюдо қайтмоқда, халқаро рестарт мусобақаси маълум

Унга кўра, 23-25 октябрь кунларига белгиланган Будапешт "Катта Дубулға" турнири билан IJF тақвимидан ўрин олган мусобақалар бошланади. Кейинги мусобақа - Токио "Катта Дубулға" турнири бўлиб, 11-13 декабрь кунларига мўлжалланган. Ҳозирча расман тасдиқланган ва эълон қилинган учинчи турнир бу Қатар "Мастерс" мусобақаси бўлиб, 2021 йилнинг 8-10 январь кунлари Доҳа шаҳрида ўтказилади. Ҳар уччала мусобақа ҳам Токио Олимпиадасига муҳим рейтинг очколарини бериши билан аҳамиятли ҳисобланади. 

IJF президенти Мариус Визер бу ҳақида ўз фикрини билдирди:

"Босқичма-босқич биз фаолиятимизни тиклаб борамиз. Бугунги дунёдаги пандемик вазият ҳар бир минтақа ва давлатда турлича. Шуни инобатга олган ҳолда мусобақаларни нисбатан хавфсизроқ мамлакатларда ўтказишни лозим топдик. Биринчилардан бўлиб Венгрия мусобақани ўтказишга тайёрлигини билдирди. Октябрь ойининг сўнгги ўн кунлигида биз Будапештда "Катта Дубулға" турнирини ўтказамиз. Спортчилар, мураббийлар ва ҳакамларнинг саломатлиги ҳамда хавфсизлигини таъминлаш учун барча саъй-ҳаракатлар амалга оширилади. Ҳукумат бунга кафолат ҳам берди. Биз томонимиздан бунга жавобгар махсус ишчи гуруҳ ҳам тузилади. Ҳа, жуда қийин даврни бошдан ўтказяпмиз. Лекин унутманг, биз биргаликда кучмиз!".