Дзюдо ривожи вилоятлар кесимида муҳокама қилинди

Табиийки, мусобақа сабаб федерациянинг барча вилоятлардаги бўлимлари мутасаддилари, мураббийлари Тошкентда жам бўлишган. 

Фурсатдан фойдаланиб, МОҚ мажлислар залида бугун дзюдо спортининг мамлакатимиздаги ривожи, хусусан 2020 йил сарҳисоби бўйича йиғилиш ўтказилди. Унда МОҚ раиси Рустам Шоабдураҳмонов, бош котиб Ойбек Касимов, раис ўринбосарлари Азизжон Камилов (Ўзбекистон дзюдо федерацияси раиси), Шерзод Ташматов, Жисмоний тарбия ва спорт вазирлиги мутасаддилари, барча вилоятлар, Тошкент шаҳри ва Қорақалпоғистон Республикасидан келган мутасаддилар иштирок этишди. Йиғилишни МОҚ раиси очиб берди.

“Дзюдо ёшларимизнинг энг севимли спорт турларидан бири. Уни янада оммалаштириш бўйича катта ҳажмда иш олиб бормоқдамиз. Халқаро дзюдо федерацияси президенти билан катталар ўртасидаги жаҳон чемпионатини Тошкентда ўтказиш бўйича келишувга эришдик. Насиб қилса, келаси йил Катта дубулға турнирини ҳам илк бора мамлакатимизда ўтказамиз. Буларнинг барчаси Сиз – дзюдо оиласи учун”, – деди Рустам Шоабдураҳмонов.  

Очиқ мулоқот тарзида кечган йиғилишда вилоятларда дзюдо ривожи йўлида йўл қўйилаётган камчиликлар, мавжуд муаммолар атрофлича муҳокама қилинди. Хусусан, ёшлар ва катталар ўртасида ўтказилган Ўзбекистон чемпионати натижалари таҳлил қилинганида, қайси вилоятларда селекция ишлари яхши йўлга қўйилмагани, бунинг оқибатида натижалар кескин пасайиб кетгани алоҳида таъкидланди. 

Янги йилнинг илк ойидаёқ дзюдо спорт тури оқсаётган Сирдарё, Жиззах, Навоий каби вилоятларга чиқилиб, у ердаги муаммолар ўрганилиши ҳамда бартараф этилиши айтилди. Шунингдек, учрашувда бир-бирига яқин вилоятлар ўртасида ўзаро ўқув-машғулот йиғинлари ва мусобақалар ўтказиш каби таклифлар муҳокама қилинди.