Дзюдо. Тиловов кутилмаганда ютқазиб қўйди, Диёрада бронза учун имконият бор

Хабар бериб ўтганимиздек, бугун 6 нафар спортчимиз баҳсларда ўз имкониятларини синаб кўришди.

-60 кг вазн тоифасидаги спортчиларимиз Муҳиддин Тиловов ва Дониёр Султонбоевлар ўзларининг илк жангларида исроиллик спортчиларга имкониятни бой бериб қўйдилар.

-66 кг вазн тоифасидаги Сардор Нуриллаев илк жангида озарбайжонлик рақибини мағлубиятга учратганди. Бироқ, кейинги босқичда моғулистонлик Алтансуҳ Довдонга ютқазиб қўйди ва мусобақа билан ҳайрлашди. Шу вазндаги Баҳром Иноятов эса илк жангида мезбон Эртугрул Донмезга имкониятни бой берди.

Қизларимиздан -52 кг вазн тоифасида Ўзбекистон шарафини ҳимоя қилаётган Диёра Келдиёрова илк жангида хитойлик рақибини мағлуб этди. Иккинчи даврада эса туркиялик Дамла Чалискандан устун келди. Ярим финалда эса исроиллик Гили Коэнга ютқазиб қўйган спортчи эндиликда бронза медали учун жанг қилади. Ушбу йўла унга бошқа бир Исроил спортчиси Ариэл Безалел рақиблик қилади.

-57 вазн тоифасидаги Санобар Султонова илк жангида озарбайжонлик Наргиз Хаджаевани мағлуб этди. Иккинчи даврада эса Исроил терма жамоаси аъзоси Тимна Нельсонга ютқазиб қўйди. Лекин, Нельсон финалга чиққани учун вакилимизда ўтиш турнирида иштирок этиш имконияти пайдо бўлди. Бироқ, Санобар ўтиш баҳсида қозоғистонлик рақибига имкониятни бой бериб қўйди.

Бугун кечки баҳсларда Диёра Келдиёровага мухлислик қиламиз.