Дзюдочиларимиз Тошкент халқаро аэропортида тантанали кутиб олинди

Уларни Ислом Каримов номидаги Тошкент халқаро аэропортида Миллий олимпия қўмитаси, Ўзбекистон дзюдо федерацияси мутасаддилари, шунингдек, дзюдо федерацияси биринчи вице-президенти Шавкат Мўминов, спортчиларнинг яқинлари ва оммавий ахборот воситалари ходимлари тантанали тарзда кутиб олишди.
Осиё чемпионатида 20дан ортиқ мамлакатдан ташриф буюрган 400 нафарга яқин спортчи иштирок этди. Мусобақада 33 нафар спортчи билан қатнашган Ўзбекистон терма жамоаси 24та медаль қўлга киритди.

Мазкур Осиё чемпионатининг аҳамиятли томони шундаки, унда Буэнос-Айресда бўлиб ўтадиган III ёзги ўсмирлар Олимпия ўйинларига йўлланма тақдим этувчи қимматли рейтинг очколари ҳам ўйналди. Спортчиларимиз 31 июлгача турли халқаро мусобақаларда иштирок этиб, рейтинг очколарини тўплаб борадилар. Шундан сўнг юқори рейтингга эга бўлган полвонлар Аргентинада ўтказиладиган ўсмирлар Олимпия ўйинлари лицензиясига эга бўладилар.