Дзюдочиларимизга Президент Мурожаатномасининг мазмун-моҳияти етказилди

Ушбу Мурожаатнома ўз ичига пандемик вазият сабаб мураккаб келган 2020 йил якунлари ҳамда 2021 йил режалари, барча соҳаларда амалга оширилиши керак бўлган устувор вазифаларни қамраб олганди.

Биз учун аҳамиятли бўлган жиҳати, Мурожаатномада жисмоний тарбия ва спорт, саломатлик мавзуларига ҳам кенг тўхталинган эди. Умуман, ҳар қандай жамият тараққиётида унинг келажагини таъминлайдиган ёш авлоднинг соғлом ва баркамол бўлиб вояга етиши ҳал қилувчи ўрин тутади. Шу сабабдан ҳам биз ислоҳотлар кўлами ва самарасини янада оширишда ҳар томонлама етук, замонавий билим ва ҳунарларни пухта эгаллаган, азму шижоатли, ташаббускор ёшларга таянамиз.

Ўзбекистон дзюдо федерациясида ўтган йиғилишда айнан Президент Мурожаатномасида кўрсатиб берилган устувор вазифаларнинг аҳамияти ҳамда моҳияти ҳақида сўз борди. Унда терма жамоа аъзолари, мураббийлар иштирок этишди. Ўзбекистон Миллий олимпия қўмитаси раис ўринбосари, мамлакат дзюдо федерацияси раиси Азизжон Камилов йиғилиш қатнашчиларига Мурожаатноманинг айнан спорт йўналишида белгилаб берилган вазифалари, илгари сурилган ташаббусларнинг аҳамияти, кўлами ҳамда ижро механизмига тўхталди.

«Биз ўз олдимизга мамлакатимизда Учинчи Ренессанс пойдеворини барпо этишдек улуғ мақсадни қўйган эканмиз, бунда, аввало, таълим ва тарбияни ривожлантириш, соғлом турмуш тарзини қарор топтириш, илм-фан ва инновацияларни тараққий эттириш миллий ғоямизнинг асосий устунлари бўлиб хизмат қилиши лозим. Ҳурматли Шавкат Миромонович ана шу муҳим йўналишларда бошланган ишларни давом эттириш, янги босқичга кўтариш мақсадида 2021 йилга мамлакатимизда “Ёшларни қўллаб-қувватлаш ва аҳоли саломатлигини мустаҳкамлаш йили”, деб ном беришни таклиф қилгандилар. Шундан келиб чиқиб, жорий 2021 йилда 70 та жисмоний тарбия ва спорт муассасаси, 16 мингта боғча ҳамда мактаблар спорт жиҳозлари билан таъминланади ва бунинг учун бюджетдан 100 миллиард сўм ажратилади. Мурожаатномада айтилганидек, аҳолини оммавий спорт турларига кенг жалб қилиш орқали 2021 йилда қамров ҳозирги 19 фоиздан 25 фоизга етказилади», – деди А.Камилов.

Мурожаатномада таъкидланганидек, жорий 2021 йилда юртимизда камида 20 та халқаро нуфузли мусобақа ўтказилиши лозим. Ана шу мусобақалардан дастлабкиси 5-7 март кунлари “Ҳумо Арена”да ўтказилувчи дзюдо бўйича “Катта Дубулға” туркумига кирувчи турнир ҳисобланади. “Катта Дубулға” мусобақаси Тошкент шаҳрида илк маротаба ўтказилади. Шу кунгача қаторасига етти маротаба Гран-При турнирлари ташкил этилган эди. Келаси йили катталар ўртасидаги жаҳон чемпионатига мезбонлик қиламиз. Бу мусобақалар бевосита юртимизда туризм ривожига ҳам хизмат қилади.