Эдди Хирн Мэнни Пакьяонинг проф рингга қайтишини кескин танқид қилди

Саккиз вазн тоифасида собиқ жаҳон чемпиони 19 июль куни АҚШда яримўрта вазнда амалдаги WBC йўналиши чемпиони Марио Барриосга қарши рингга кўтарилади.

"Биринчидан, унинг Барриосга кучи етмайди. Иккинчидан, мен ҳозир ўзимни тақводор қилиб кўрсатиб, бу жанг шармандалик эканини айтмоқчи эмасман. Лекин барибир боксдан беш йилга йўқолиб кетиб, камига 46 ёшда қайтиш мумкинлигига ишонгим келмайди. Ўз даврини ўтаб бўлган деган сўзни ишлатишни истамайман, чунки бу жуда ҳурматсизлик. Ташкилотга қўнғироқ қилиб, "Эй аҳмоқлар, мени рейтингда бешинчи ўринга қўйинглар" деб айтишни ўзи шармандачилик. Жин урсин, ҳеч бўлмаса 14-ўринга қўйишса бўларди... Нега уни бешинчи ўринга қўясиз? Нега уни рейтингга қайтаряпсизлар ўзи?",  — дея Хирннинг сўзларини келтиради Boxing Scene.

Эслатиб ўтамиз, жанг эълон қилинишидан олдин WBC ташкилоти 5 йил олдин фаолиятини якунлаган Мэнни Пакьяони рейтингнинг 5-поғонасига жойлаштирган эди.