Элнур Абдураимов бугунги жанги ҳақида: "Анчадан бери ринг кўрмаганим сабабли, жанг ўзим хоҳлагандек бўлмади"

Жангда Абдураимов ҳакамларнинг якдил қарори билан ғалаба қозонган эди.

"Бугун "IBA Чемпионлар оқшоми"даги биринчи жангимни ўтказдим. Мусобақа яхши ташкил қилинган. Анчадан бери ринг кўрмаганим сабабли, мексикалик рақибимга қарши жанг ўзим хоҳлагандек бўлмади. Яратганга шукур, шунга қарамай, ғалаба қозондик. 

Рингга ҳеч қачон кучсиз рақиблар чиқмайди. Бу бокс - боксда ҳамма нарса олдиндан кутилади. Ўзим олдиндан 6 раунд жанг қилишни режалаштирган эдим. Чунки, анчадан буён катта рингга чиқмаган эдим. Сабаби, охирги бор Мексикада ўтказган жангимда очколар ҳисобига кўра мағлубиятга учраб, IBF камаримни бой берган эдим. Мана 1 йилдан сўнг Аллоҳнинг изни билан рингга кўтарилдим. Албатта, буни мухлислар ҳам яхши билади: 1 йил танаффусдан кейин рингда ўзимни тутишим барибир бироз ноқулай бўлди. Қийинчилик бўлди, рақиб ҳеч қачон сизга ютқазаман, деб чиқмайди.

Яратганга шукур, яхши раунд ўтказдик ва очколар ҳисобида ғалаба қозондик", деди Элнур Абдураимов.