Энди Олимпиадада қиличбозлик бўйича 12 та медаллар жамланмаси ўйналади

ХОҚ қарорига биноан, Японияда бўлиб ўтадиган Олимпиада ўйинларида энди 12 та медаллар жамланмаси ўйналадиган бўлди. Ушбу медаллардан 6 таси яккалик, яна 6 таси жамоавий баҳсларда ўйналади.

Халқаро қиличбозлик федерацияси (FIE) 10 йилдан ортиқ вақт давомида ушбу таклифни ХОҚқа илгари суриб келаётганди.

Федерация Рио Олимпиадасидан сўнг қиличбозликка эътибор ошганини, ОАВ ва ижтимоий тармоқларда ушбу спорт бўйича кенг муҳокамалар бўлиб ўтаётганини ушбу таклифда асос қилиб олди.

"Менинг энг катта орзуларимдан бири амалга ошди. Федерация президентлигидаги энг асосий мақсадларимни амалга ошира олдим. ХОҚнинг ушбу қарори қиличбозликнинг ривожланаётгани ва оммавий спорт турларидан бирига айланаётганлигининг яна бир тасдиғидир.

Миллий федерациялар, спортчилар ва қиличбозлик дунёси ушбу қарор учун ХОҚнинг ижроия қўмитасига, Олимпия дастури комиссиясига миннатдорчилик билдиради", - дейди Халқаро қиличбозлик федерацияси Президенти Алишер Усмонов.

P.S. Бунгача Олимпиадада қиличбозлик спорт тури бўйича 10 та медаллар жамланмаси ўйналарди.