Енгил атлетика бўйича жаҳон чемпионатида ўзбек спортчилари: Кимдир финалда, кимдир эса финишга ҳам етиб бора олмади

Мусобақада ўзбекистонлик атлетлар ҳам иштирок этишмоқда. Терма жамоамиз Қатарга 6 нафар спортчи билан йўл олганди. 

Баландликка сакраш:

Светлана Радзивил

Надия Дусанова

Учхатлаб сакраш:

Руслан Қурбонов

Марафон:

Ситора Ҳамидова

Андрей Петров

Кўпкураш:

Екатерина Воронина

Бунгача бир неча йўналишларда ҳамюртларимиз стартга чиқиб улгуришди. 

Баландликка сакраш бўйича аёллар ўртасидаги беллашувларда иштирок этаётган Светлана Радзивил 1.94 метр баландликни забт этди ва финалга йўл олди. Энди у 30 сентябрь куни 12 нафар спортчи ичида медаллар учун баҳсга киришади. Мазкур йўналишда ўз омадини синаб кўрган Надия Дусанова эса 1.80 метр натижа билан саралашдан ўта олмади. 

Эркаклар ўртасида учхатлаб сакраш беллашувларида иштирок этган Руслан Қурбонов эса 15,86 метр натижа билан 33 нафар иштирокчи ичида "фахрли" 31-поғонадан жой олди. 

Аёллар ўртасидаги марафон беллашувларида эса Ситора Ҳамидова маррага етиб бора олмади. Андрей Петров эса 5 октябрь куни эркаклар ўртасидаги марафонда ўз омадини синаб кўради. 

Кўпкураш баҳсларида иштирок этадиган Екатерина Воронина ҳали ўз иштирокини бошламади.