Эркебулан Токтар жангни сотгани ҳақидаги гап-cўзларга жавоб қайтарди

«Азиз дўстлар! Кеча мен дам олишга келганим ҳақида видео жойладим, хонани кўрсатдим... Шу видеога ёзилган изоҳларни ўқисам, "сен ютуғингни букмекерга сотиб, шу пулга дам оляпсан", "сен ўз шаънингни сотдинг", "шармандасан", "сен 400 миллион олдинг" деган гаплар ёзилган. Қаердандир 400 миллион деган рақам пайдо бўлибди ва ижтимоий тармоқларда шу гаплар тарқаляпти. Шунинг учун барчасини тушунтириш учун бу видеони ёзаяпман.

Келинглар, буни ёзаётганлар, бироз мантиқ билан ўйлайлик. Бизга ҳеч ким миллионлаб пул тикмайди. Биз "Реал Мадрид", ПСЖ ёки Конор Макгрегор эмасмиз — бутун дунё пул тикадиган даражадаги юлдузлар эмасмиз. Бизга оддий қизиқиш учун кўпи билан 5 ёки 10 минг тенге тикилaди. Буни ёзаётганлар, эҳтимол, ўзлари ҳам 1-2 минг тенгедан тиккан бўлиши мумкин. Ҳатто 10 минг киши 2 минг тенгеден тикса ҳам — бу жами 20 миллион тенге бўлади.

Хўш, мен жангни атайлаб ютқазишга рози бўлишим учун улар менга қанча тўлаши керак? Ҳар қандай инсон рози бўлиши мумкин бўлган сумма бор, лекин у сумма жуда ҳам улкан бўлиши керак», — деди жангчи.

Токтар ва Марсель ўртасидаги бокс қоидалари бўйича, ММА қўлқопларидаги жанг 27 март куни Арманистоннинг Ереван шаҳрида Hype FC турнири доирасида бўлиб ўтди. Қозоғистонлик Токтар еттита ғалабали серия билан фаворит ҳисоблансада, уч раунд якунларига кўра, ҳакамларнинг бир овоздан қабул қилган қарори билан қирғизистонлик Марселга ютқазди.