Эртага Қатар "Мастерс" турнири бошланади. Бугун қуръа!

Қатар пойтахти уч кун давомида мавсумнинг илк турнирига мезбонлик қилади. Қатар "Мастерс" турнири нуфузи жиҳатидан жаҳон чемпионатидан сўнг эътироф этилиши боис, мусобақага бўлган қизиқиш жуда ҳам юқори. Ҳар бир вазн тоифасида дунёнинг кучли 32 нафар дзюдочиси мусобақа медаллари ҳамда Токио Олимпиадаси йўлидаги муҳим рейтинг очколари учун татамига чиқади. 

Қатар "Мастерс" турнири ғолиби олтин медаль, пул мукофоти билан бирга қимматли 1800 рейтинг очкосини ҳам қўлга киритади. Таққослаш учун, Жаҳон чемпионатида чемпионга 2000 рейтинг очко берилади. "Мастерс"да кумуш медаль соҳиби 1260, бронза медали эгалари 900 рейтинг очкосини ўз ҳисобларига қўшиб қўйишади. Кучли бешликдан жой олган дзюдочилар 648, 7-ўринни банд этганлар эса 468 очкога эга бўлишади.

Бугун мусобақага қуръа ташлаш маросими бўлиб ўтади. Қатардаги ҳозирги коронавирус билан боғлиқ мавжуд қоидаларга кўра аренага умумий сиғимдан 30 фоизгача миқдорда мухлисларнинг киришига рухсат берилади.