Эътиборимиз марказида дзюдо бўйича йил якунлари

Хусусан, бугун Миллий матбуот марказида Ўзбекистон дзюдо федерациясининг йил якунлари ҳамда янги мавсум режаларига бағишланган матбуот анжумани ташкил этилди. Тадбир Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги, Миллий матбуот маркази, Ўзбекистон Миллий олимпия қўмитаси ҳамда “UzReport” телеканали билан ҳамкорликда ташкил этилди.

Матбуот анжуманида МОҚ бош котиби Ойбек Касимов, Ўзбекистон Миллий олимпия қўмитаси раиси ўринбосари, Ўзбекистон дзюдо федерацияси раиси Азизжон Камилов, шунингдек, дзюдо терма жамоаси бош мураббийи Илиас Илиадис, терма жамоа аъзолари ҳамда оммавий ахборот воситалари ходимлари ҳозир бўлишди.

Анжуманни кириш сўзи билан бошлаган О.Касимов гарчи 2020 йилнинг катта қисми карантин пандемияси билан ўтиб кетган бўлса-да, мавсум дзюдочилар учун муваффақиятли бошланганини таъкидлади.

“2020 йил январь ойи ўзбек дзюдоси учун унутилмас воқеликлар билан ёдда қолди. 15 январь куни Халқаро дзюдо федерацияси президенти Мариус Визернинг Тошкентга ташрифи давомида юртимизда дзюдо спортини янада ривожлантириш ва оммавийлигини ошириш борасида қатор лойиҳалар имзоланди. Улар орасида 2021 йилга мўлжалланган катталар ўртасидаги жаҳон чемпионати мезбонлигини Тошкентга берилишини алоҳида таъкидлаш жоиз. Эпидемиологик вазият туфайли ушбу жаҳон чемпионати 2022 йилга қолдирилди. Шунингдек, Жисмоний тарбия ва спорт ҳамда Халқ таълим вазирликлари, Халқаро ҳамда Ўзбекистон дзюдо федерациялари ўртасида мамлакатимиздаги 20 та умумтаълим мактабида “Мактабларда дзюдо” дастури бўйича 4 йиллик меморандумга имзо чекилди”, – деди О.Касимов.

Шундан сўнг федерация раиси А.Камилов терма жамоамизнинг халқаро мусобақалардаги иштирокига тўхталди.

“2020 йил мавсуми Исроил пойтахти Тель-Авив шаҳрида ўтказилган Гран-при мусобақаси билан бошланди. 8-9 февраль кунлари Франция пойтахти Париж шаҳрида «Катта Дубулға» туркумига кирувчи нуфузли турнир бўлиб ўтди. Муросасиз кечган турнирда Шарофиддин Болтабоев (-81 кг) кумуш ва Ҳикматиллоҳ Тўраев (-73 кг) бронза медалларига сазовор бўлишди. Февраль ойининг ўзида йилнинг иккинчи «Катта Дубулға» турнири Дюссельдорф шаҳрида ўтказилди. Қувонарлиси, Давлат Бобонов (-90 кг) ва Муҳаммадкарим Хуррамов (-100 кг) мусобақанинг олтин медалларига сазовор бўлишди. Бу билан ҳамюртларимизнинг “Катта Дубулға” турнирларидаги сўнгги 10 йилликдаги энг яхши натижаси қайд этилди. Мазкур мусобақадан кейин спортчиларимизнинг Олимпиада рейтингидаги ўрни сезиларли даражада яхшиланди”, – деди А.Камилов.

Шундан сўнг матбуот анжуманининг савол-жавоб қисмига ўтилди.

– Терма жамоаларда психологларнинг ўрни катта. Бу борада психологлар фаолиятига тўхталиб ўтсангиз.

А.Камилов: – Тўғри таъкидладингиз, спортда психологик жиҳатга эътибор қаратиш алоҳида аҳамиятга эга. Шу ўринда ҳукуматимизнинг қўллаб-қувватлаши билан терма жамоаларимизда шу соҳа вакиллари учун алоҳида штат ажратилган ва улар иш олиб боришмоқда. Тўғри, спорт соҳасида малакали психологлар кўп эмас. Шундай бўлса ҳам жамоаларда ишлаётган мутахассисларимиз бир-бирлари билан тажриба алмашиб туришибди.

– Ўзбекистонда Осиё ўйинлари ҳамда Олимпиаданинг ўтказилиш имкониятини қандай баҳолайсиз?

– Хабарингиз бор, мамлакатимиз 2025 йил ёшлар ўртасида ўтказиладиган Осиё ўйинларига мезбонлик қилади. Бу каби комплекс мусобақа Ўзбекистонда илк бор ташкил этилади. Ўйлайманки, навбати билан сиз айтган мусобақалар мезбонлигига ҳам гал келади. Халқаро мусобақаларни ўтказиш бўйича тажрибага эгамиз. Муҳими, ҳукуматимиз бу ғояларни ҳар томонлама қўллаб-қувватлайди.

Шунингдек, анжуман давомида спортчи, мураббийлар ва федерация раҳбарияти ўртасидаги муносабатлар, Токио-2020, Париж-2024 Олимпия ўйинлари, Ханчжоу-2022 Осиё ўйинларига тайёргарлик масалалари бўйича савол-жавоблар бўлиб ўтди.