Фаррух Дўстов: "1:1 ҳам яхши натижа. Таркибимизда ўзгариш бўлиши мумкин"

Иккита ўйин якунига кўра, ҳисоб 1:1 кўринишига келган. Денис Истомин имкониятни бой бериб қўйган бўлса, Сергей Фомин ғалаба қозониб, мувозанатни тиклади. 

Сайтимиз муҳбири Хуршида Абдикулова бугунги баҳслардан сўнг терма жамоамиз сардори Фаррух Дўстовнинг фикрлари билан қизиқди. 

- Истоминнинг мағлубиятига сабаб нима деб ўйлайсиз? 

- Истомин қўлидан келган барча ишни қилди, унда матчбол ҳам бор эди. Ўйин уч соатгача чўзилди. У ғалабага яқин эди. Денис 36 ёшда ва тикланиш жараёни ҳам узоқ кечмоқда. Бу нарса унга таъсир қилмоқда. У ютиши ҳам мумкин эди, аммо бу спорт.

- Эртанги ўйинга унинг жисмоний ҳолати қандай бўлади? 

- Бугун буни яна муҳокама қиламиз ва эрталаб бу борада якуний қарорни айтамиз. Таркибда ўзгариш бўлиши мумкин. 

- Япония юртимизга кучли таркиб билан келмаган. Бу Ўзбекистон терма жамоасини менсимаганликданми? 

- Мен бундай демаган бўлардим. Улар терма жамоа сафида "Дэвис кубоги"дан кўра, ўзларининг яккалик мусобақаларини асосий ҳисоблашади. Уларда шунингдек жароҳатлар ҳам бор эди. Улар яқинда US Open'да ҳам иштирок этишди. Масофа ҳам узоқ. 

1:1 ҳам яхши натижа. Эртага насиб қилса жуфтлик ва яккалик ўйинида ғалаба қозонамиз. 

- Денис Истоминдан сўнг афсуски, ёш теннисчиларимиз ATP даражасидаги турнирларга чиқа олишмаяпти. Бу нима билан боғлиқ? 

- Яхши савол. Фикримча, улар турнирларда кўп ўйнашмаяпти. Амалиёт кам. Мусобақаларга бориш учун молиявий имкониятлар ҳам кам. Авваллари имкониятлар бор эди, ёрдам бериб туришарди. Ҳозир эса уйда машғулотлар қилиб юришибди. Бундай ҳолатда кучайиш қийин, айниқса теннисда.