Физиев Дос Аньос билан жангни ўтказиб юбориши ҳақида гапирди

"Мен тўлиқ вайрон бўлдим, аммо Рафаэль дос Аньос билан жангда қатнаша олмаслигимни эълон қилишга мажбурман. Мен залда ажойиб тайёргарлик олиб бораётгандим, сизлар учун шоу кўрсатишга тайёр эдим. Таиланддан Лас-Вегасга учиб келдим ва коронавирус юқтириб олдим. Учинчи куни ҳароратим юқорилиги, суяклардаги оғриқ ва йўтал туфайли хонамда қолдим.

Соғлиғим яхшиланганидан кейин дос Аньос билан албатта жанг қиламан. Ундан кечирим сўрамоқчиман, лекин буни тилёғламалик дейиш — мутлақо ёлғон. Вақт барчасини ўз ўрнига қўяди", - деди Физиев "Твиттер"даги саҳифасида.

Жанг 5 март санасида, UFC 272 турнири доирасида бўлиб ўтиши керак эди. Шу билан ушбу жанг иккинчи маротаба қолдирилмоқда — илк жанг 19 февраль куни Лас-Вегасда бўлиб ўтиши керак эди, аммо қирғизистонлик жангчида виза муаммолари борлиги сабаб бекор бўлганди.

Эслатиб ўтамиз, Физиев сўнгги жангини UFC Vegas 44 турнири доирасида янги зеландиялик Бред Ридделга қарши ўтказган. Ўшанда Рафаэль рақибини учинчи раундда нокаутга учратиб, ғолиб бўлган эди. Аралаш яккакурашларда Физиев 12 та жанг ўтказиб, 11 та ғалабага эришган ва бир маротаба мағлубиятга учраган.

Дос Аньос эса сўнгги жангини 2020 йил ноябрь ойида америкалик Пол Фелдерга қарши ўтказган ва ҳакамлар қарорига кўра ғолиб деб топилган. Рафаэль аралаш яккакурашларда жами 43 та жанг ўтказган. 30 та жангда ғалаба қозонган бўлса, 13 тасида мағлубиятга учраган.