Флик Германия терма жамоаси тарихидаги биринчи истеъфога чиқарилган мураббий

Германия футбол иттифоқи Ханс-Дитер Фликни истеъфога чиқарди. Флик охирги бешта ўйиннинг тўрттасини ютқазганди. 

 Sky Sport Deutschland нашрининг хабар беришича, Германия терма жамоасининг мураббийлари тарихда бирор маротаба ҳам хайдалмаган. Шу пайтга қадар барча мураббийлар ё шартномаси якунлангач, ёки ўз хоҳишига кўра, Германия термасини тарк этганди. Ханс-Дитер Флик истеъфога чиқарилган биринчи мураббий бўлди.

Бундан олдин ўнта мураббий Германия терма жамоасини бошқарган. Булар Отто Нерц, Зепп Хербергер, Хельмут Шен, Юпп Дерваль, Франц Беккенбауэр, Берти Фогтс, Эрих Риббек, Руди Феллер, Юрген Клинсманн ва Йоахим Лев ҳисобланади.