Флойд Мейвезер профессионал боксга қайтишини маълум қилди

24 февраль куни 49 ёшини нишонлайдиган афсона илк расмий жангини 2026 йилнинг ёзида ўтказишни режалаштирмоқда. Рақиб номи кейинроқ эълон қилинади. Мейвезер CSI Sports/Fight Sports промоутерлик компанияси билан шартнома имзолади.

Бу Мейвезернинг профессионал рингга тўртинчи қайтиши бўлади. У 2007, 2015 ва 2017 йилларда фаолиятини якунлашини эълон қилган эди. Америкалик сўнгги расмий жангини 2017 йилнинг августида Конор Макгрегорга қарши ўтказиб, техник нокаут эвазига ғалаба қозонган ва мағлубиятсиз сериясини 50 та ғалабага етказганди.

"Мен ҳали ҳам боксда янги рекордлар ўрнатишга қодирман. Майк Тайсон билан бўлажак жангдан тортиб менинг навбатдаги профессионал жангимгача - ҳеч ким менинг тадбирларимдан кўпроқ томошабин тўплай олмайди. Катта глобал аудиторияни таъминлай олмайди ва кўпроқ пул ишлай олмайди", - дея Мейвезернинг сўзларини келтиради Sky Sports.

Фаолияти давомида америкалик боксчи ўз даврининг барча кучли рақибларини мағлуб этган. Унинг ҳисобида бокс тарихидаги энг кўп даромад келтирган учта жанг - Мэнни Пакьяо, Конор Макгрегор ва Сауль Альваресга қарши жанглар бор. Аввалроқ Пакьяо Мейвезер билан 2026 йилда реванш ўтказиш бўйича музокаралар олиб борилаётганини маълум қилганди.