Фокина фаолиятида илк бор ATP турнири финалида ўйнайди

Испаниялик теннисчи ярим финал баҳсида болгариялик Григор Димитровдан устун келди. Бу билан у ўз фаолиятидаги илк ATP турнири финалига йўл олди. Биринчи финалидаёқ у "Мастерс" чемпионлигини қўлга киритиши мумкин.   

Алехандро шу кунгача икки бор Эшторил (2019 йил - Пабло Куэвасга, 2021 йилда Альберт Рамосга ютқазган) турнири 1/2 финалига қадар етиб келган эди. Шунингдек, бир маротаба Кёльн-2020 турнири ярим финалида Александр Зверевга имкониятни бой берган эди.

Бугун Фокина Монте-Карло "Мастерс" турнирининг финал учрашувида дунёнинг бешинчи ракеткаси, грециялик Стефанос Циципасга қарши кортга чиқади. Натижадан қатъий назар, у эртага эълон қилинадиган ATP рейтингининг Топ-30`талигида дебют қилади. Агар у бош совринни қўлга киритса, 20-ўрингача кўтарилади.