«Формула-1» Баҳрайн Гран-приси мезбонлигини Малайзияга кўчирди

Натижада Баҳрайн Гран-приси эндиликда 2–4 октябрь кунлари Малайзиянинг Сепанг автодромида ўтказилади.

12 апрель куни Баҳрайнда бўлиб ўтиши керак бўлган «Формула-1» босқичи Малайзияга кўчирилди ва 2–4 октябрь кунлари ўтказилади. Бу ҳақда мусобақанинг расмий сайтида маълум қилинди.

Мусобақа 2017 йилдан буён «Формула-1» босқичларига мезбонлик қилмаётган Сепанг халқаро автодромида бўлиб ўтади.

Малайзиядаги пойга тақвимга кўра Боку босқичи (26 сентябрь) ва Сингапур босқичи (11 октябрь) оралиғида ташкил этилади.

Ташкилотчиларнинг таъкидлашича, мусобақалар тақвимида бошқа ўзгаришлар бўлмайди.

Эслатиб ўтамиз, март ойида «Формула-1» АҚШ ва Исроилнинг Эронга қарши ҳарбий амалиёти ортидан юзага келган вазият сабаб Баҳрайн ва Саудия Арабистонида апрель ойига белгиланган босқичларни бекор қилган эди.