ФОТО. Салом Жакарта, салом Палембанг!

Айнан шу куни муҳташам “Бунг Карно” стадионида Осиё Олимпиадасининг тантанали очилиш маросими бўлиб ўтади. Аслида қитъа ўйинлари бироз аввал, аниқроғи футбол мусобақаси учрашувлари билан старт олган эди. Ўзбекистон олимпия терма жамоаси илк турда бангладешлик футболчилар устидан ишончли (3:0) ғалабага эришишганди. Бугун Равшан Ҳайдаров шогирдлари Қатар терма жамоасига қарши майдонга тушишади. Ушбу баҳс “Пакансари” стадионида Тошкент вақти билан соат 17:00да бошланади.

Кеча эса каттагина Ўзбекистон спорт делегацияси Тошкент - Куала-Лумпур рейси билан Малайзия пойтахтига етиб келди. Делегация 89 кишидан иборат эди. Индонезияга тўғридан-тўғри авиа рейс бўлмагани боис, Жакарта ва Палембангга Куала орқали училди. 

Делегация таркибидан бокс, академик эшкак эшиш ҳамда катта теннис спорт тури вакиллари жой олишганди. Бу ерда делегация иккига бўлинди. Ўн уч соатлик кутишдан сўнг 34 кишидан иборат биринчи гуруҳ Палембангга, қолганлар эса Жакартага йўл олишди. 

Дарвоқе, делегация таркибида жами 20 нафар ОАВ ходимлари ҳам бор эди. Ўзбекистон Миллий олимпия қўмитаси ташаббуси ҳамда кўмагида илк маротаба ана шундай каттагина гуруҳ бевосита мусобақа манзилидан Осиё ўйинларини ёритиб боришади. 

Палембангда камина ҳамда МОҚ фото мухбири Абдулла Файзуллаев спортчиларимизнинг машғулоти, олимпия шаҳарчасидаги яшаш тарзи, мусобақадаги иштироки, сўнгги натижалар, умуман барча-барчаси ҳақида баҳоли қудрат тезкорлик ила маълумотлар етказиб боришга ҳаракат қиламиз. 

Бугун эрталаб 1 соату 25 дақиқалик парвоздан сўнг Куала-Лумпурдан Палембанг шаҳрига етиб келдик. Бизни бу ерда мусобақа ташкилотчилари очиқ чеҳра билан кутиб олишди. Осиё ўйинларини юқори савияда ўтказиш учун яхшигина тер тўкилгани шаҳар остонасиданоқ кўриниб турибди. Волонтёрлар, яъни кўнгиллиларнинг хушмуомалалигини алоҳида таъкидлаш ўринли. 

Кўчаларга мусобақа руҳиятини бериб турувчи турли ҳажмдаги баннерлар жойлаштирилган. Шаҳарда мотоциклларнинг жуда ҳам кўплиги диққатимизни ўзига тортди. Шарқий Осиё мамлакатларига хос ҳолат. Намгарчилик юқорироқ эканлигини инобатга олмаса, ҳарорат у даражада иссиқ эмас. Айни пайтда ҳарорат 30-32 даража атрофида. 

Палембангда ўзбекистонлик спортчилар академик эшкак эшиш, байдарка ва каноэ, триатлон, ўқ отиш ва катта теннис мусобақаларида иштирок этишади. 23-24 август кунлари академик эшкак эшиш бўйича барча ғолиб ва совриндорлар номи маълум бўлади. 

Бугун куннинг иккинчи ярмида теннис бўйича терма жамоамиз машғулотларни бошлайди. Биз теннисчиларимизнинг машғулотидан репортаж тайёрлашни мақсад қилганмиз. Биздаги маълумотларга кўра, академик эшкак эшиш спорт тури вакилларининг қайиқ ва бошқа анжомлари ҳали Палембангга етиб келмаган. Шу боис, ҳозирча илк машғулотнинг қачон ўтказилиши маълум эмас. 

Камолиддин Алимов  Куала-Лумпур (Малайзия) - Палембанг (Индонезия)

Суратлар муаллифи - Абдулло Файзуллаев