Фёдор Чудинов: "Акам учун қасос оламан"

Оқшомнинг марказий жангида иккинчи ўрта вазн тоифасида собиқ WBC Silver камари соҳиби Азизбек Абдуғофуров (13-1,5 КО) россиялик тажрибали боксчи, собиқ жаҳон чемпиони, ҳозирда иккинчи ўрта вазнда WBA Gold камари соҳиби бўлиб турган Фёдор Чудиновга қарши рингга кўтарилади. Ушбу жанг 10 раунд этиб белгиланган.  

Кеча боксчилар матбуот анжуманида иштирок этишди ва журналистларни қизиқтирган барча саволларга жавоб беришди. 34 ёшли Чудинов (25-2-1,17 КО) Абдуғофуровдан акасининг мағлубияти учун реванш олиш истагида эканини маълум қилди.

"Вазият тақозоси билан жангим уч марта қолдирилди. Шунча марта вазн ҳайдашга тўғри келди.  Ҳа, бу асаб бузарликдан ҳеч ким кафолатланмаган. Ҳозир ўзимни жуда яхши хис қиляпман. Мураббийим билан бирга рақибим иштирокидаги жанглар, хусусан Павел Силягинга қарши ўтказган сўнгги баҳсини кўриб, таҳлил қилиб чиқдик. Жангга зарур тактика ва стратегияни ишлаб чиқдик. 

Азизбек — тезкор ва шу билан бирга ностандарт боксчи. Унинг асосий қуроли — бу тезлик! Аввалги жангларимдаги тактикани бу сафар ўзгартираман. Илк раунддан биринчи рақам остида ҳаракат қиламан. Одатда тўртинчи ёки бешинчи раунддан бошлар эдим. Унгача кузатув бўларди. Акам 2018 йил Абдуғофуровга ютқазиб қўйганди. Мени ҳамон ўша мағлубият қийнайди. Қасос олиш учун боримни бераман. Бунинг учун совуққон бўлишим керак", — деди 34 ёшли Чудинов.