"Ғалабамни ота-онам ва фарзандларимга бағишлайман", - Истам Қудратов

Кеча иккинчи кун финал баҳслари ҳам ўз якунига етди. Жанговор самбо бўйича -71 кг.гача бўлган вазнда юртимиз шарафини ҳимоя қилган Истам Қудратов финалда қирғизистонлик тажрибали рақибини енгиб, жамоамизга олтин медални тақдим этди. Ғалабадан сўнг спортчимизнинг жанг ҳақидаги фикрларига қизиқдик:

"Гувоҳи бўлганингиздек, финалда қирғизистонлик кучли рақиб Темарлан Токторбаев устидан ғалаба қозондим. Бундан аввалги баҳсларда тожикистонлик спортчи ҳамда ўзимизнинг терма жамоамиз вакили билан беллашган эдим. Шукурки, финалда ҳам ғолиб бўлиб терма жамоамиз ҳисобига олтин медални ёздириб қўйдим. Бизнинг шундай натижаларга эришишимиз йўлида меҳнат қилаётган Ўзбекистон Самбо Ассоциацияси раҳбариятига, Ички Ишлар вазирлигига, мураббийларимга алоҳида миннатдорчилик билдираман. Осиё чемпионатларидаги учинчи олтин медалимни қўлга киритдим. Ғалабамни ота-онам ва фарзандларимга бағишлайман", - деди  Истам Қудратов.

Сарвиноз Рахмонқулова сухбатлашди